ඇඩානා

(සේහාන්) දකුණු තුර්කියෙහි සේහාන් ගඟබඩ පිහිටි නගරයකි. එනමින් හැඳින්වෙන පළාතක් ද එහි වෙයි.

ක්‍රි.පූ. 63 දී මහා පොම්පේ අධිරාජයා විසින් සුළු ආසියාවෙහි බලකොටුවක් සේ ඉදි කරන ලද මේ නගරය පසු කලක නැගෙනහිර මධ්‍යධරණී මුහුදු මංකොල්ලකාරයන්ගේ සුළු ආසියාතික මධ්‍යස්ථානය විය. කල්යෑමේ දී එය වැදගත්කමින් අඩු වී ගිය නමුත් ජිස්ර්-අල්-වාලිද් (743), හාරුන්-අල්-රෂීද් (782) සහ අල්-මුතාසිම් (840) යන කාලිප්වරුන් විසින් යථාතත්වයට පත් කරන ලද්දේය. 1832 දී ඇති වූ තුර්කි-මිසර යුද්ධයේ දී මිසර සේනාධිපති ඊබ්‍රාහිම් පාෂාට පවරා දෙනු ලැබූ මෙම නගරය නැවත තුර්කීන් අතට පත් වූයේ 1840 දී ඇති කරගත් ගිවිසුමකිනි. කපු, ලොම් සහ හම් කර්මාන්ත නගරයෙහි කෙරෙයි. ජනගහනය (1960) 230,024කි.

ඇඩානා නගරය වර්ග සැතැපුම් 6,663ක් පමණ විශාල ඇඩානා පළාතෙහි අගනුවර ද වේ. ඇළදොළ සහිත සාරවත් තැන්නක පිහිටි හෙයින් දේශගුණයෙහි ඇති යෝග්‍යතාව නිසාත් ජල සම්පාදන ක්‍රමවල දියුණුව නිසාත් ඇඩානා ප්‍රදේශය කපු, වී, උක් සහ පලතුරු ආදිය වචන කෘෂිකාර්මික ප්‍රදේශයකි. ටෝරස් වැටිය ආශ්‍රිත කඳු ප්‍රදේශය ඛනිජ වස්තුවලින් පරිපූර්ණ වුවත් ආර්ථික ව්‍යාපාරයක් වශයෙන් ඛනිජ හාරා ගැනීමක් තවමත් කරනු නොලැබේ. ඇඩානා පළාතේ ජනගහනය (1960) 763,222කි.

(සංස්කරණය: 1967)