ඇඩිස් අබාබා
(නව කුසුම). ඇබිසීනියාවේ හෙවත් ඉතියෝපියාවේ අගනුවරය. මෙය පිහිටා ඇත්තේ ඇබිසිනියානු සානුවෙහි එන්ටෝටෝ කඳු වැටියේ දකුණු බෑවුමේ, යූකලිප්ටස් ගස්වලින් ගහන වූ ද මුහුදු මට්ටමේ සිට අඩි 8,000ක් උස් වූ ද ප්රදේශයකය. ග්රීෂ්ම ඍතුව වර්ෂාධිකව ද ශීත ඍතුව වියළිව ද පවතින මෙහි දේශගුණය හිතකරය. ජලය හිඟ නොවන නිසා ද පස සාරවත් නිසා ද අවට ප්රදේශයෙහි ගොවිතැන් සහ සතුන් ඇති කිරීම බහුලව කෙරේ. රටේ ප්රධාන වෙළෙඳ මධ්යස්ථානය මෙන් ම ප්රධාන පාලක මධ්යස්ථානය ද වූ මේ නගරය සෝමාලිලන්තයේ ජිබුටි තොට සමඟ දුම්රිය මාර්ගයෙකින් ද (1918) රටේ ඒ ඒ පළාත් හා එරිට්රියාවේ අස්මරා, ඇසබ් ආදි නුවරවල් සමඟ මහා මාර්ගවලින් ද ග්රීසිය, සුඩානය සහ මිසරය සමඟ අහස් ගමනාගමනයෙන් ද සම්බන්ධ වී තිබේ.
දෙවැනි මෙනෙලික් රජු විසින් 1889 දී ඉදිකරන ලද මෙම නගරය 1936 දී ඉතාලි ජාතිකයන් විසින් අල්ලා ගන්නා ලදුව මුළු ඉතාලි නැගෙනහිර අප්රිකාවේ අගනුවර බවට පත් කරන ලදි. 1941 දී බ්රිතාන්ය සහ ඉතියෝපියානු හමුදා නගරය ආපසු අල්ලා ගත් කල යළිත් ඇබිසීනියානු රාජ්යය පිහිටුවනු ලැබීය. නවීන සම්ප්රදායානුකූලව නගරය ප්රතිසංස්කරණය කිරීම වර්තමාන ඇබිසීනියානු ආණ්ඩුව මගින් කරගෙන යනු ලැබේ.
දැනට නගරයේ පවතින ප්රධාන ගොඩනැඟිලිවලින් බොහොමයක් ඉතාලි සමයට අයත්ය. මෙනෙලික් රජුගේ පුරාණ මාළිගය ද වර්තමාන අධිරාජ මන්දිරය (ඝෙබ්බි) සාන්ත ජෝජ් දෙව්මැදුර ද මෙහි ඇති ප්රධාන ගොඩනැඟිලිවලින් කීපයකි. ප්රධාන කර්මාන්ත සියල්ල ම පාහේ ආහාර සහ කපු ද්රව්ය නිෂ්පාදනයට සම්බන්ධව පවතී. නගරයේ ජනගහනය (1961) 129,000කි.
(සංස්කරණය: 1967)
