ඇලානි

ඉන්දු-අයිරේනියන් පවුලට අයත් සංචාරක ජන කොට්ඨාසයකි. ඇලානිවරු ක්‍රි.පූ. 65 දී පමණ කොකේසස් ප්‍රදේශයේ සිට ඩොන් සහ වොල්ගා යන ගංගා දක්වා උතුරට ගමන් කළහ. ක්‍රි.ව. 375 දී හන්වරුන් විසින් පරාජය කොට කොකේසස් ප්‍රදේශයෙන් පලවා හරින ලද ඔවුන්ගෙන් වැඩි දෙනෙක් සුඒවීවරුන් හා වැන්ඩල්වරුන් සමඟ ගෝල් හා ස්පාඤ්ඤ අර්ධද්වීපය ආක්‍රමණය කොට එහි පදිංචි වූහ. යළිත් විසිගොත්වරුන් විසින් ඒ රටවලිනුත් පලවා හරිනු ලැබූ ඔව්හු වැන්ඩල්වරුන් සමඟ උතුරු අප්‍රිකාවට ගියහ. ඉන් පසු ජාතියක් වශයෙන් ඔවුන් නොහැඳින්වුණු බව පෙනේ. කොකේසස්හි ඔසෙට්වරු නැගෙනහිරට ගිය ඇලානිවරුන්ගෙන් පැවතෙතැයි විශ්වාස කරනු ලැබේ.

(සංස්කරණය: 1967)