ඊචාං

චීනයේ ගිවිසුම් තොටක් ව පැවති මෙම කුඩා නගරය නැගෙනහිර චීනයේ දකුණු හූපේ පළාතෙහි යැංත්සි ගඟ බඩ පිහිටියේය. දකුණු චීන මුහුදේ සිට ඊචාං දක්වා සැ. 1000ක් යැංත්සි ගඟ ඉහළට සාගර තරණය කරන විශාල නැව් පවා ගෙනගිය හැකි වේ. යැංත්සි දොරු මගින් සච්වාන් පළාතට ගෙන එනු ලබන්නා වූත් ඉන් ගෙන යනු ලබන්නා වූත් වෙළෙඳ ද්‍රව්‍ය නැවකින් නැවකට මාරු කරන ස්ථානය වශයෙන් ඊචාංහි ඇති ආර්ථික වැදගත්කම මහත්ය.

1876 චෙෆූ ගිවිසුම අනුව ගිවිසුම් තොටක් වූ ඊචාං 1943 ජනවාරි 11 වැනි දින බ්‍රිතාන්‍යය හා ඇමෙරිකා එක්සත් ජනපද රාජ්‍යය චීනය සමඟ ඇති කර ගත් ගිවිසුමකින් පසුව එම තත්වයෙන් නිදහස් විය. ඊචාංහි ජනගහනය 1953 දී 100,000ක් පමණ විය.

(සංස්කරණය: 1970)