උදයගිරි-2

ඉන්දියාවේ බේස්නගර් නුවරට සැතපුම් දෙකක් නිරිත දිගින් නොහොත් සාංචි ප්‍රදේශයට සැතපුම් පහක් දුරින් පිහිටි පැරණි ගල්ලෙන්, සිද්ධස්ථාන ආදියෙහි නෂ්ටාවශේෂයන්ගෙන් ගැවසීගත් පර්වතයකි.

මෙහි තිබී සොයාගත් ගල් ලෙන් සංඛ්‍යාව දහයකි. මින් සමහරක් ඉදිරි පාර්ශ්වය හා එක් පැත්තක් බිත්තිවලින් ද අනික් පැති ගලෙන්ද ආවරණය වන සේ තැනූ ලෙන්ය.

උදයගිරියේ ඇති විශාලතම ලෙන අමෘතගුහා නමින් හැඳින්වේ. දිගින් අඩි 22ක් ද පළලින් අඩි 19කුත් අඟල් 4ක්ද වූ මේ ලෙනෙහි ශිවලිංගයක් තිබේ. පර්වතයේ වයඹ කොනේ කුටි පසකින් යුත් ජෛන ලෙනකි. එය ගුප්ත සමයට අයත් බැව් එහි වූ ශිලා ලිපියකින් හෙළිවේ. උදයගිරියේ ගල්ලෙන් හා ගොඩනැගිලිවල නෂ්ටාවශේෂයන්ගෙන් වැඩි කොටස හින්දු හා ජෛන ආගම්වලට අයත්ය. පර්වතයේ දකුණුදිග හා මුදුනේ ද බෞද්ධ සිද්ධස්ථානයන්ගේ නටබුන් හමු වූ බව ජනරාල් කනිංහැම් මහතා කියයි.

(සංස්කරණය: 1970)