උදය (කුමරා)

රම්බෑව පුවරු ලිපියෙහි පේළි අතුරෙහි තිබී මෑතක දී ආචාර්ය පරණවිතාන මහතා විසින් කියවන ලද ලේඛනයක සිද්ධයාත්‍ර ලෙසත් සඳහන් වන මේ තෙමේ කාශ්‍යප මහාරාජ හෙවත් V වැනි කාශ්‍යප (914-923) රජුගේ පුත්‍රයෙකි. මෙම කුමරා චූලවංසයෙහි හඳුන්වා ඇත්තේ “සිද්ධත්ථ නම් වූ මලයරාජ යයි ප්‍රසිද්ධ රුවින් මලවියා බඳු” යන ලෙසිනි. සිද්ධත්ථ යන්න පිළිබඳව කරුණු දක්වන පරණවිතාන මහතා එය ඔහුගේ පෞද්ගලික නාමය නොවන බවත් නාවික කටයුතුවල ඔහු ලබා තිබූ දක්ෂතාව නිසා පිරිනමන ලද විරුදයක් බවත් කියයි. ඔහුගේ පෞද්ගලික නාමය වූයේ උදය යන්නයි.

හෙතෙම රුහුණෙහි ඈපා ලෙස විසූ මහින්ද නම් සොහොවුරා හා සටන් කොට ඉන් පැරද ජාවාරටට ගියේය. එහි දී බාලපුත්‍ර රජුගේ දුව පාවාගෙන පසුව එහි සිහසුනට පත් වූ හෙතෙම ශ්‍රී විජය රාජ්‍යයෙහි මහාරාජා ලෙස සමෘද්ධිමත් රාජ්‍ය කාලයක් ගත කොට මිය ගියේය. මහින්ද IV (බ.) විසින් රාජ්‍යය ලබාදුන් ගුණාර්ණව ඔහුගේ මුනුබුරා විය.

පොත්පත්

Paranavitana, S. -Ceylon and Malaysia

(සංස්කරණය: 1970)