උප්සාලා

(අප්සාලා). ස්වීඩන් රටේ පළාතක් ද එහි අගනුවර ද මෙනමි. ස්ටොක්හෝම් නගරයට බටහිර දිගින් පිහිටි මෙයාලරන් විලට උතුරු දිගින් බොත්නියා බොක්ක දෙසට විහිදි අප්සාලා පළාත ව.කිමී. 5,398ක් විශාලය. වන පෙදෙස් බහුල මෙහි ව.කිලොමීටරයකට ජනගහනය 34 දෙනෙක් පමණ වෙත්. පළාතේ ජනගහනය (1964) 180,410කි.

පළාත මධ්‍යයෙහි වූ අප්සාලා නගරයේ සිට ස්ටොක්හෝම් අගනුවරට දුර සැතැපුම් 116ක් පමණ වේ. ස්වීඩන් රටේ ඉතා ම පැරණි වූත් වැදගත් වූත් විශ්ව විද්‍යාලය මෙහි පිහිටි හෙයින් අධ්‍යාපන මධ්‍යස්ථානයක් වශයෙන් මෙම නගරය මහත් ප්‍රසිද්ධියක් උසුලයි. ලෝහ හා පේෂ කර්මාන්ත ද සපත්තු කර්මාන්තය ද ආදි නවීන කර්මාන්ත කීපයක් මෙහි ඇත. මාර්ග සන්ධිස්ථානයක් වශයෙන් ද නගරය වැදගත් වේ. මීට අවුරුදු 1,200කට පමණ පෙර මෙහි පූජක පිරිසකගේ දේවස්ථානයක් පිහිටුවීම නිසාත් ප්‍රාදේශීය පාලකයන්ගේ මධ්‍යස්ථානය වීම නිසාත් වර්තමාන නගරයට සැතැපුම් තුනක් පමණ උතුරු දිගින් වූ ගැම්ලා අප්සාලා නම් වූ ස්ථානයෙන් මෙම නගරයේ ආරම්භය ඇති වී යැයි සලකනු ලැබේ. අප්සාලා නරගයේ ජනගහනය (1964) 84,272කි.

(සංස්කරණය: 1970)