උෆා

සෝවියට් රුසියාවේ බෂ්කීර් සමුහාණ්ඩුවේ ප්‍රධාන නගරයයි; උ‍ෆා, බ්යෙලයා යන ගංගාවන්ගේ දෙමෝදරට නුදුරුව පිහිටා ඇත්තේය. වොල්ගා-ඌරල් තෙල් ආකර ප්‍රදේශයෙහි තෙල් පිරිසුදු කිරීමේ මධ්‍යස්ථානය වශයෙන් සැලකෙන මෙය ඌරල් කාර්මික ප්‍රදේශයේ වැදගත් නගරයක් බවට ද පත්ව තිබේ. තඹ උණු කිරීම, දැව කර්මාන්තය, පිටි කර්මාන්තය හා මද්‍යසාර පෙරීම මෙහි සැලකිය යුතු අනික් කර්මාන්තයෝය. මෝටර් රථ කර්මාන්තය ද කරනු ලැබේ. වැදගත් දුම්රිය මංසන්ධියක් වන මෙය බෂ්කීර්හි ප්‍රධාන වෙළඳ නගරයක් ද වේ. ආසන දෙව් මැදුරත් හිටපු ආණ්ඩුකාරතැනගේ නිවාසය හා කලා කෞතුකාගාර ද්වයත් මෙහි ඇති සැලකිය යුතු ගොඩනැඟිලිය. මෙය බෂ්කීර් සමූහාණ්ඩුවේ සංස්කෘතික මධ්‍යස්ථානය ද වේ.

කසාන් නගරයේ වැටීමෙන් පසු රුසියානුන් විසින් මේ නගරය ඉදිකරන ලද්දේ 1574 වර්ෂයේ දීය. මෙහි ජනගහනය (1965) 665,000ක් පමණ වේ. ජනගහනයේ වැඩි කොටස තුර්කි භාෂාව කතා කරන මුස්ලිම් ජනකායක් වූ බෂ්කීර්වරුන්ගෙන් සමන්විත වෙයි.

(සංස්කරණය: 1970)