එංගඩීන්
(Engadine). ස්විට්සර්ලන්තයේ ග්රෞබ්යුව්ඩන් පළාතේ පිහිටි ඉන් ගංගා මිටියාවතේ ඉහළ කොටස මෙනමින් හැඳින්වේ. මලෝජා කඳු පාමුල සිට මාර්ටින්ස්බ්රුක් ග්රාමය දක්වා සැතැපුම් හැටක් පමණ ඉන් ගංගාව දෙපස විහිදී ගිය මේ දර්ශනීය මිටියාවත ඉහළ එංගඩීන් (නිරිත දිග කොටස) සහ පහළ එංගඩීන් (ඊශාන දිග කොටස) යනුවෙන් කොටස් දෙකකට බෙදේ. ඉහළ එංගඩීන්හි ප්රධාන නගරය සාමාඩෙන්ය. ෂුල්ස් පහළ එංගඩීන්හි අගනුවරයි.
ස්වාභාවික දර්ශන අතින් කීර්තියක් උසුලන එංගඩීන් මිටියාවත දේශ සංචාරක මධ්යස්ථානයක් වශයෙන් මෙන් ම සෞඛ්ය මධ්යස්ථානයක් වශයෙන් ද සැලැකේ. මෙහි සෙන්ට් මොරිට්ස් පෙදෙස ඛනිජ දිය උල්පත් සම්බන්ධයෙන් 16 වැනි සියවසේ සිට ම ප්රසිද්ධය. මලෝජා, සිල්ස්, සිල්වාප්ලානා, කෑම්ප්ෆර් යන පෙදෙස් රෝගීන්ට උචිත වාතාශ්රය ඇති පෙදෙස් හැටියට ප්රසිද්ධය.
එංගඩීන් මිටියාවත දුර්ග මාර්ග, විල්, ග්ලැසියර, කඳු මුදුන් ආදියෙන් දැකුම්කලුය. වනාන්තරවලින් ගහන මේ ප්රදේශයෙහි ගොවිතැන් කොට ඇත්තේ මඳ වශයෙනි. නිතර වේගයෙන් සුළං හමන ප්රදේශයක් වූ මේ මිටියාවතෙහි ගිනි විපත්වලින් මිදෙනු වස්, ගෙවල් ඉදි කොට ඇත්තේ කළුගලිනි.
(සංස්කරණය: 1974)
