ඔපෝර්ටෝ
(පෘ. පෝර්තු). මෙය පෘතුගාලයේ දෙවන විශාලතම නගරයයි. පෝට් වයින් පෙරීම සම්බන්ධයෙන් මෙනුවර ලෝක ප්‍රසිද්ධය. ඩෝරූ ගඟේ උතුරු ඉවුරේ පිහිටි මෙනුවර උතුරු පෘතුගාලයේ අගනුවර වශයෙන් ද සලකනු ලැබේ. ප්‍රධාන දුම්රිය මාර්ග තුනක් මේ නගරයේ දී එක් වේ. එහි පෝට් වයින් වෙළඳාම විශාල වශයෙන් කරනු ලැබේ. ඔපෝර්ටෝ නගරය හාත්පස ප්‍රදේශය මිදී වතුවලින් ගහන වූවකි. මේ නගරයට අයත් වරාය කුඩා යාත්‍රාවන්ට පමණක් සීමා වූවක් බැවින් ද ඩෝරූ ගඟේ විශාල යාත්‍රා පැදවිය නොහැකි බැවින් ද ලේඉෂෝඩිෂ්හි වරායක් තැනීමෙන් මගීන් හා බඩු ගෙනයාමට පහසුකම් සැලසී තිබේ. විශ්වවිද්‍යාල, විද්‍යායතන, දේවස්ථාන, පුස්තකාල, කෞතුකාගාර ආදියෙන් මේ නගරය ශෝභමානය.
වයින් පෙරන ස්ථාන, රෙදිමෝල්, සීනි පිරිසිදු කරන ස්ථාන හා වෙනත් කර්මාන්තශාලා රාශියක් මෙහි තිබේ. වයින්, බ්රැන්ඩි, සාඩින්, දුම්මල (ලාටු), ටර්පන්ටයින්, ගල්ලෑලි, ඔලිතෙල්, දැව, පොරොප්ප, කපුපිළී, මසුන්ගේ තෙල් ආදිය මින් පිටරට යවන ද්‍රව්‍යය. ජනගහනය (1965) 319,000කි.
(සංස්කරණය: 1974)
