ජාක් නෙකර්
(Jacques Necker). ස්විස් ජාතික බැංකුකරුවකු වූ ජාක් නෙකර් ප්‍රංසයේ 16 වන ලුවී රජතුමාගේ මුදල් ඇමතිවරයකු විය. රජයේ මුදල් පාලනය කිරීමෙහිලා ඔහු ස්තු වූ දක්ෂතාව පිළිගත් කරුණක් වුව ද ප්‍රංස විප්ලවයේ ආරම්භක අවධියේ දී ඔහුගේ ක්‍රියා කලාපය වැනෙනසුලු විය. වර්ෂ 1732 සැප්තැම්බර් 30 දා ජිනීවා නගරයෙහි උපන් නෙකර් බ්‍රැන්ඩන්බරත්හි නීතිඥයකු වූ චාල්ස් ෆෙඩ්රික් නෙකර් නම් පුද්ගලයාගේ බාල පුත්‍රයා විය. අවුරුදු 16 දී ඔහු බැංකුවක ලිපිකරුවකු ලෙස සේවයට බැඳුණේය. 1750 දී පැරිසියට පැමිණි හේ 1762 දී එම බැංකුවේ කනිෂ්ට හවුල්කරුවකුගේ තත්ත්වයට උසස් විය. පසුව ධනවත් බැංකුකරුවකු ලෙස ප්‍රසිද්ධියට පත් වූවා පමණක් නොව ප්‍රංස නැගෙනහිර ඉන්දියා වෙළෙඳ සමාගමෙහි අධ්‍යක්ෂ ධුරයට ද පත්විය. නෙකර් ප්‍රොතෙස්තන්ත්‍රවාදී විදේශිකයකු වුව ද රාජකීය භාණ්ඩාගාරයෙහි අධ්‍යක්ෂ ලෙස ප්‍රංසයෙහි මුදල් පාලනය මුළුමනින් ම පාහේ ඔහු අතේ පැවතිණ. 1777 දී ඔහු මුදල් පිළිබඳ අධ්‍යක්ෂ ජනරාල්වරයා ලෙස පත් කරනු ලැබී ය. ප්‍රතිසංස්කරණයන්, සේවා අත්හිටුවීම් හා වැඩි පොළියට ණය ගැනීම් ආදියෙන් රටේ ආර්ථිකය නංවාලීමටත්, ජනතා විශ්වාසය දිනා ගැනීමටත් ඔහු යත්න දැරී ය. ආර්ථික කටයුතු පිළිබඳ ලියූ ලේඛකයකු වශයෙන් නිදහස් වෙළෙඳ ප්‍රතිපත්තියක් අනුගමනය කිරීම ඔහු හෙළාදැක්කේ ය. එස්ටේට් ජනරාලය තුළ මධ්‍යම පන්තියේ නියෝජිත සංඛ්‍යාව රදල හා පූජක පන්තිවල නියෝජිත සංඛ්‍යාව හා සමාන විය යුතු යැයි නෙකර් යෝජනා කෙළේ ය. එහෙත් ඊට රදළ හා පූජක පන්ති විරුද්ධ වූ බැවින් එය ක්‍රියාත්මක කිරීමට නොහැකි විය. ඇමෙරිකානු නිදහස් සටනට හවුල් වූ ප්‍රංස සේනාවන් සඳහා මුදල් වැය කිරීමට ගත් උත්සාහය ඔහු අතින් සිදු වූ මූලික වැරදීම ය. 1781 දී ඔහුට සිය තනතුරෙන් ඉල්ලා අස්වීමට සිදුවිය. 1787 දී ඔහු යළි පැරිසියට පැමිණි නමුදු ප්‍රංස ආර්ථික ප්‍රතිපත්තිය සම්බන්ධයෙන් කැලෝන් හා මතභේදයක් ඇති කර ගැනීම නිසා රටින් පිටුවහල් කරන ලදි. එහෙත් 1788 දී මුදල් පිළිබඳ අධ්‍යක්ෂ ජනරාල් පදවිය සඳහා 16 වන ලුවී රජතුමා යළිත් නෙකර් පත් කෙළේ ය. බදු ක්‍රමය ප්‍රතිසංස්කරණය කිරීම සඳහා එස්ටේට්ස් ජනරාලය රැස්කරවා ගැනීමට ඔහුට හැකිවිය. එහෙත් 1789 ජූලි 11 දා ඔහු යළිත් තනතුරෙන් පහකිරීම නිසා බැස්ටීලය වැටලීම වැනි නොසන්සුන්තාවන් පැරිසියෙහි ඇති විය. දින නවයකට පසු ඔහු යළිත් එම තනතුර සඳහා පත් කර ගන්නා ලදි. ටැලිරන්ඩ් සහ මීරබෝගේ විප්ලවකාරී මුදල් ප්‍රතිසංස්කරණ ඉදිරියේ ඔහුට වැඩි යමක් කිරීමට නොහැකි විය. 1790 සැප්තැම්බර් 18 දා ඔහු අවසාන වරට සිය තනතුරෙන් ඉල්ලා අස්විය. ඉන්පසු ස්විට්සර්ලන්තයේ තමාට අයත් වත්තක විශ්‍රාම සුවයෙන් කල් ගෙවූ නෙකර් 1804 අප්‍රේල් 9 දා මිය ගියේ ය.
(කර්තෘ: කේ.බී. සෝමරත්න)
(සංස්කරණය නොකළ)
