ජෝන් ක්වින්සි ඇඩම්ස්
27 හැවිරිදි ඇඩම්ස් හේග්හි ඇමෙරිකන් නියෝජිතයා හැටියට ජනාධිපති වොෂිංටන් විසින් 1794 දී පත් කර යවන ලදි. ඉක්බිති සිය පියා ජනාධිපතිව සිටි කාලයේ දී ප්රසියාවේ ඇමෙරිකන් තානාපතියා සේ පත් කර යවනු ලැබූ මෙතෙම 1803 දී මැසචුසෙට්ස් ප්රදේශයෙන් ෆෙඩරල් පාක්ෂික සෙනෙට් සභිකයකු හැටියට පත් විය. 1808 දී ලූසියානා ප්රදේශය මිලට ගැනීමේ ජැක්සන් යෝජනාවට පක්ෂ වූයෙන් ඔහුට පෙඩරල් පක්ෂයෙන් අස්වීමට සිදු විය. ඉක්බිති 1809 දී රුසියාවේ ඇමෙරිකානු තානාපතියා වශයෙන් පත් වූ ඔහු 1814 දක්වා එම පදවිය දැරීය. අනතුරුව කලක් මහා බ්රිතාන්යයේ ඇමෙරිකානු තානාපතියා ලෙස ද සේවය කළ පසු ඔහුට 1817 දී මොන්රෝ ජනාධිපතිවරයාගේ රාජ්ය ලේකම් ධුරය පැවරිණ. 1824 ජනාධිපති තරඟයේ දී ඩෙමොක්රැටික් පක්ෂ නියෝජිත ජැක්සන් පරදවා ඇඩම්ස් ජයග්රහණය කළේය. එහෙත් ඔහුගේ ජනාධිපති කාලය ඔහුට හෝ රටට එතරම් හිතකර නොවීය. ඔහුට කොංග්රෙස් සභාවේ සහයෝගය මඳ විය. සිව්වසකින් පසු 1828 දී එළඹි මැතිවරණයේ දී ජැක්සන් ජයගත්තේය. අනතුරුව කොංග්රෙස් සභිකත්වය ලත් ඇඩම්ස් එතැන් සිට 18 වර්ෂයක් හුදකලාව ම වාගේ රජය සමඟ සටනෙහි යෙදුණේ ය. වහල් මෙහෙයට විරුද්ධව අප්රතිහත ධෛර්යයෙන් යුතුව සටන් කළ ඔහු වහල් මෙහෙයට විරුද්ධ පැමිණිලි ගැන පනවන ලද මුකවාඩම් පනත් ඉවත් කරගැනීම පිණිස ආණ්ඩුව සමඟ බලවත් සටනක් කෙළේය.
(සංස්කරණය: 1967)
