ටවුංගු

(Toungoo). මියන්මාරයෙහි පේගු (Pegu) පළාතෙහි සිටාං (Sittang) නිම්නයේ පිහිටි දිස්ත්‍රික්කයක් හා එහි පරිපාලන මධ්‍යස්ථානය මෙනමින් හැඳින්වේ.

මියන්මාර ඉතිහාසයේ මෙම නගරය වැදගත් වන්නේ ක්‍රි.ව. 16-18 සියවස්වල දී මෙය අගනගරය ලෙස පවත්වා ගනිමින් මියන්මාර් දේශය පාලනය කළ ටවුංගු රජ පෙළපත නිසා ය. 1510 දී මින්කින්යෝ (Mingkyinyo) රජු විසින් ගොඩනංවන ලද මෙම නගරය එකල හැඳින්වූයේ කේතුමදී (Ketumadi) යන නමිනි. 1540 වනතුරු ටවුංගු රාජධානියේ අගනුවර වශයෙන් පැවතියේ මෙම නගරයයි.

ව.කිමී.12,813ක භූමි ප්‍රමාණයකින් සමන්විත ටවුංගු දිස්ත්‍රික්කය බටහිරින් පේගු යෝමා (Pegu Yoma) කඳුවැටියෙන් ද නැගෙනහිරින් ෂාන් (Shan) සානුවෙන් ද සීමා වේ. පුළුල් බටහිර කඳුවැටිය අගනා දැවවලින් සමන්විත වේ. දිස්ත්‍රික්කයේ මධ්‍යම කොටසෙහි වී ගොවිතැන සිදු කෙරේ.

2014 දී ටවුංගු නගරයේ ජනගහනය 262,056ක් විය.

(කර්තෘ: දේවිකා ප්‍රියදර්ශනී එදිරිවීර)

(සංස්කරණය: 2019)