නිෂාධ

ස්වයම්භූ මනුගේ වංශයෙන් පැවත ආ වෙන රජුගේ මෘත ශරීරයේ දකුණු ජංඝාවෙන් උපන් පුත්‍රයෙකි. වෙන රජකමට පත්වීමෙන් පසු යාඥයාගාදී කර්ම පැවැත්වීම නවත්වා තෙමේ ඊශ්වරයාගේ අවතාරයකැයි ප්‍රකාශ කෙළේ ය. මේ ක්‍රියා නොඉවසූ ඍෂිවරු කුසතණ මිටිවලින් ගසා ඔහුගේ දිවි තොර කෙළේ ය. ඉන් පසු රජකු නොමැති වීම නිසා රටේ සොරකම් ආදි දුශ්චරිත බහුල වූයෙන් පුතකු ලබා ගැනීමට වෙනගේ මෘත ශරීරයේ දකුණු ජංගාව පිරිමදින ලදින් කාළ වර්ණ මිටි පුරුෂයකුගේ උත්පත්තිය විය. ඒ දුටු ඍෂිවරු ඔහුට වාඩිවෙන්නට ‘නිෂීධ’ යැයි කීහ. එකල හේ වාඩිවිය. මේ නිසා ඔහුට නිෂාධ යන නම ඇති විය. වින්ධය පර්වතයෙහි වාසයට ගිය ඔහුගෙන් පැවත එන්නන්ට ද නිෂාධ යන නම ව්‍යවහාර කළහ. වනචාරී වූ ඔවුන් අධම ක්‍රෑර ක්‍රියා කරමින් දිවි පැවැත්වූ බව ද කියැවේ.

(කර්තෘ: ඩී.ආර්. සෙනෙවිරත්න)

(සංස්කරණය නොකළ)