මොලොක්
(Moloch). පරණ තෙස්තමේන්තුවේ සඳහන් පරිදි ජෙරුසලම ආශ්‍රිත ප්‍රදේශවල පැවැති දරුවන් බිලිදීමෙන් දෙවියන් ඇදහීමේ නැකැත් චාරිත්‍රයෙකි. ඊශ්‍රායල් ජාතිකයන්ගේ සම්මාන ලද මිථ්‍යාදෘෂ්ටික දෙවියෙක් ද මෙනමින් සිටියේ යයි පිළිගනිති. මෙම දෙවියන් පිදීමේ ක්‍රමය වූයේ කුඩා දරු දැරියන් ගිනිගොඩ හරහා යාමට සැලැස්වීමයි. මෙය පිරිසුදුබව ලැබීමේ මාර්ගයක් සේ සැලකුව ද ඇත්ත වශයෙන් දරුවන් බිලිදීමේ හා පිළිස්සීමේ මාර්ගයෙකි. පරණ තෙස්තමේන්තුවේ සඳහන් පරිදි හිතොබ් මිටියාවෙතේ තනන ලද විශේෂ ස්ථානයක් වූ ‘ටෝපෙට්’හි දී ගිනි ගොඩ හරහා යාම කරන ලදි. එහි ම සඳහන් පරිදි යහ්වා පිදීම සඳහා ජුඩාහි මෙම පිළිවෙත අනුගමනය කරන ලදි. ක්‍රි.පූ. 18 වැනි ශතවර්ෂයේ දී තරම් පලස්තීනයේ හා සිරියාවේ අට දින වයසැති දරුවන් බිලිකොට සශ්‍රීකත්වය හා සම්බන්ධ පිළිවෙත් උදෙසා ගර්භාෂයේ හැඩයට වූ භාජනවල දමා වැලලූ බව කියවේ.
බයිබලයේ සඳහන් පරිදි මොළොක් යන්නෙන් අමොන්හි දරුවන්ට කරන ලද පිළිකුල් සහගත ක්‍රියාව යන අරුත් දේ.
(කර්තෘ: පණ්ඩුල ඇඳගම)
(සංස්කරණය නොකළ)
