සුප්පවාසා
(කෝලිය දියණිය). ගෞතම බුද්ධ ශාසනයේ ශ්‍රේෂ්ඨ උපාසිකාව වු මෝ තෝමෝ ප්‍රණීත දායිකාවන්‌ගෙන් අග්‍ර වූවා ය (එතදග්ගං භික්ඛවෙ මම සාවිකානං උපාසිකානං පණීතදායිකානං යදිදං සුප්පවාසා කොලියධීතා, අ..නි.1, අතදග්ගපාළි).
කෝලිය රජු‌ගේ දියණිය වූ මෑ සීවලි තෙරුන්ගේ මව ය. මැයගේ සැමියා මහාලී නමැති ලිච්ඡවි කුමරෙකි. සුප්පාවාසා වාසය කළේ සජ්ජනේල නම් කෝලිය ගමෙහි ය.
මැය සත් අවරුද්දක් ම සීවලි කුමරු කුසේ දරා සිටි බව ද සත් දිනක් ම ප්‍රසව වේදනාවෙන් සිට බුදුන්ගේ ආශීර්වාදයෙන් පසු කුමරු බිහි වූ බව ද කියනු ලැබේ. එසේ වීමට හේතුව විස්තර කරමින් අසාතරූප ජාතකය දේශනා කර තිබේ.
වරෙක බුදුරජාණන් වහන්සේ සජ්ජනේල ගමට වැඩි විටෙක දානය දීම පිළිබඳ ආනිසංස ඇයට දේශනා කළහ. ගෞතම බුදුසසුනෙහි ප්‍රකට දායික දායිකාවන් වූ අනාථපිණ්ඩික, විශාඛා ආදීන්ගේ සංඛ්‍යාවේ ලා සලකනු ලැබූ මෙතුමිය සෝවාන් වූයේ බුදුන් දුටු පළමු දිනයේ දී ම ය.
(කර්තෘ: ජයන්ත විමලසේන)
(සංස්කරණය නොකළ)
