අ'ටිකේරියාව
(Urticaria). මෙය චර්ම රෝගයකි. රෝගියාගේ ශරීරයෙහි හදිසියෙන් පලු නැගී ඒවා පසුව නැති වී යෑම මේ රෝගයෙහි ප්‍රධාන ලක්ෂණය වේ. හමේ පලු සෑදෙන විට ඇති වන රිෂ්ටවල (lesions) ඉස්ම තිබෙන මැද ප්‍රදේශය සුදුපාටය. ඒ වටා තිබෙන ප්‍රදේශය රතුපාටය. එකී රිෂ්ට තත්පර ස්වල්පයක දී සෑදෙන්නට පුළුවන. ඒවා අතිශයින් කසනසුලුය.
අ'ටිකේරියාව සාමාන්‍යයෙන් ඇති වන්නේ කිසියම් අසාත්මිකතාවක් (allergy) හේතුවෙනි. ඉස්සන්, පොකිරිස්සන්, කකුළුවන් වැනි ආහාර ද අච්චාරු වර්ග ද නොයෙක් විට අ'ටිකේරියාව ඇති කරයි. අන්නාසි, ඇඹරැල්ල හා බිලින් වැනි අම්ලික ඵල වර්ග කෑමෙන් ද අ'ටිකේරියාව ඇති වන්නට පුළුවන. පෙනිසිලින් (බ.) වැනි ඖෂධ වර්ග ද අටිකේරියාව හට ගැනීමට හේතු වේ. රසායන ද්‍රව්‍යයක් හෝ විෂ ශාකයක් වැනි බාහිර ද්‍රව්‍යයක් ස්පර්ශ වීමෙන් ද අ'ටිකේරියාව ඇති විය හැකිය. තද අව්ව හෝ අධික ශීතලය හේතුකොටගෙන ද අ'ටිකේරියාව ඇති වන්නට පුළුවන.
අ'ටිකේරියාව ඇති කරන හේතුව සොයා ගෙන එය ඉවත් කරලීමෙන් මේ රෝගය සාමාන්‍යයෙන් නිවාරණය කළ හැකිය. චර්ම රිෂ්ට සෑදෙන්නේ හිස්ටමින් නමැති ද්‍රව්‍යයක් ශරීරයෙහි මුක්තවීම නිසා බැවින් ඇතැම් ප්‍රතිහිස්ටමින් ද්‍රව්‍ය අ'ටිකේරියාවට සාර්ථක පිළියමක් වශයෙන් යොදනු ලැබේ. ඇතැම් හෝර්මෝන (බ.) වර්ග ද අ'ටිකේරියාව මර්දනය කිරීමට යෝග්‍යය. අසාත්මිකතාව බ.
(සංස්කරණය:1965)
