අක්මීම්

දකුණු මිසරයේ පිහිටි වෙළඳ නගරයකි. නයිල් ග‍ඟේ දකුණු ඉවුරෙහි පිහිටි මේ නගරයට ඇස්යුත් නගරයේ සිට දුර සැතපුම් 64කි. පුරාණයේදී, අපු හා ඩෙන්-මින් යන මිසර නාමයන්ගෙන් ද පනොපොලිස් සහ කෙමිස් යන ග්‍රීක නම්වලින් ද හඳුන්වනු ලැබුයේ මේ නගරයය. පර්සියුස්ට කැප වූ දේවස්ථානයක් කෙමිස් නගරයෙහි වූ බවත් එම වීරයා වෙනුවෙන් ග්‍රීක සම්ප්‍රදායානුකූලව පැවැත්වූ ක්‍රීඩෝත්සව නිසා මේ නගරය ප්‍රසිද්ධියට පත්වූ බවත් හෙරොඩොටස් පවසයි. එහෙත් හෙරොඩොටස් විසින් එසේ අදහස් කරන ලද්දේ කොප්ටොස් නගරය දැයි සැක සහිතය. කෙමිස්හි වියන ලද අලංකාර රෙදි වර්ග, රෝම සහ කොප්ටික් යුගවල දී මිසරයෙන් පිටරට යවන ලදි. මෙකල සෑහෙන දියුණුවක් ඇති වෙළඳ නගරයක් මෙන් ම කාර්මික නගරයක් ද වන අක්මීම්හි දුප්පත් සාමාන්‍ය මිසර ජනයාගේ ඇඳුම් වන නිල් කමිස සහ සළු ද නිපදවනු ලැබේ. මුස්ලිම් සහ කොප්ටික් ක්‍රිස්තියානි ආගමික මධ්‍ය ස්ථානයක් ව පැවතුණු අක්මීම්හි බොහෝ දේවස්ථාන ද නටබුන් ද වෙයි. නොන්නුස් නමැති ග්‍රීක කවියා උපන්නේ ද මෙහිය. ජනගහනය (1956) 40,800කි. (සංස්කරණය:1963)