අඞ්කුශ මාරණය

සූසැට කලාශිල්පයන්ගෙන් එකකි. අකුස්ස හෙවත් හෙණ්ඩුව ඇවිළවීමෙන් ඇතුන් දමනය කිරීම, සොඬ හැකිළවීම හා දිග හැරවීම, අභිමත පරිදි හැසිරවීම, ඇවිස්සීම, භය කරවීම, නිල ඇල්ලීම, ඖෂධයෝගාදියෙන් අකුසු කොළය පණ පෙවීම, කටුගැසීම, කටුගසා හෝ නිල අල්ලා මැරීම, උමතු කරවීම, ඔත්පල කරවීම ආදිය මේ ශාස්ත්‍රයෙහි ඇතුළති. ඇතුන් හික්මවීමේ දි ඒ ඒ කුලවලට අයත් ඇතුන්ගේ මර්මස්ථාන හෙවත් නිල ප්‍රමුඛස්ථානයක් ගනී. අකුසුපොළ, අවකම්පොළ, ගමන්නිල, රහස්පොළ, කෝළපොළ, කුමුදුපොළ, කටුපොළ, වැඩපොළ, විසඹපොළ, පොරොදුපොළ, ඇවිසුම් පොළ ආදි නම්වලින් මෙකී මර්මස්ථාන හඳුන්වා තිබේ. අකුස්ස පණපෙවීමට යොදන විවිධ ඖෂධ වර්ග, අකුස්සෙන් ඇල්විය යුතු ප්‍රමාණ, කටුගැසීම හා මන්ත්‍රාදිය මෙහි ඇතුළත් වෙනත් කරුණුය.

(සංස්කරණය:1963)