අඞ්ගීරස 2
ඉන්දියාවේ බ්‍රාහ්මණ වංශිකයෝ තමන් සෘෂිවරුන්ගෙන් පැවතෙනුවන් කොට සලකති. භෘගු අඞ්ගීරස, මරීචි අත්‍රි වසිෂ්ඨ පුලස්ත්‍ය පුලභ හා ක්‍රතු නමින් දන්නා කුල ඒවායේ ආදි කර්තෘවරුන් වූ සෘෂිවරුන්ගේ නාමයන්ගෙන් හැඳින්වේ. මේ සෘෂිවරු පිතාමහ, මහාපුරුෂ ආදි නම්වලින් හැඳින්වෙන මහබඹුගේ මනසින් උපන් පුතුන් ලෙස සලකති. ඔවුන්ගෙන් පැවතෙතැයි සැලකෙන බ්‍රාහ්මණ පවුල් ඉතා ම පැරණි හැටියට ගණන් ගැනේ. අඞ්ගීරස සෘෂිවරයාගෙන් පැවත එන්නෝ අඞ්ගිරසයෝයි. ප්‍රථම අඞ්ගීරස සෘෂිවරයා අග්නිගේ පියා බැවින් ඔහුගෙන් පැවත එන්නෝ අග්නිගේ පරම්පරාවට අයත්හයි සැලකූහ. අඞ්ගීරස මහා අග්නිගේ යඥකර්ම කළ වේදපාරප්‍රාප්ත සෘෂිවරයකු වශයෙන් විනය පිටකය හඳුන්වයි. මිලින්ද ප්‍රශ්නයෙහි අඞ්ගීරස සෘෂිවරයා දක්ෂ වෛද්‍යවරයකු වශයෙන් හඳුන්වා ඇත.
අඞ්ගීරස නමින් හැඳින්වෙන පැරණි ම සෘෂිවරයා වෘහස්පතීය. දෙවියන් එක්පසකට ද දෛත්‍යයන් දානවයන් හා අසුරයන් අනික් පසට ද වී කළ යුද්ධයේ දී ඔහු දෙවියන්ට උදවු වීමට ගිය බැව් කියනු ලැබේ. පළමුවන අඞ්ගීරස ගෝත්‍රිකයා අයාස්‍ය සෘෂිවරයා ය. ශුනඃ ශේප බිල්ලට දෙමින් අයෝධ්‍යාපුරයෙහි හරිශ්චන්ද්‍ර රජතුමාගේ රාජ්‍ය සමයේ දී කරන ලද යාගය මොහු විසින් පවත්වන ලද බව කියැවේ. ආදි ම අඞ්ගීරසවරුන් ජීවත්වූයේ අයෝධ්‍යා පුරයෙහි මන්ධාතු රජතුමා රජකළ සමයේ යයි කියති. ඓතිහාසික යුගයෙහි අඞ්ගීරසයන් හැටියට සැලකිය හැකි සෘෂිවරුන් විසාලා පුරයේ රජවරුන්ට පරම්පරානුගත පුරෝහහිතකම් කළ බව පෙනේ. විසාලා පුරයේ රජවරුන් වූ කරන්ධම හා අවික්ෂිත් යන රජවරුන්ගේ පුරෝහිතයා බවට පත් වූයේ අඞ්ගීරස ගෝත්‍රෙය් උෂිජා නමැති බ්‍රාහ්මණ ඍෂිවරයෙකි. ඔහුගේ පුතුන් දෙදෙනෙකු වූ වෘහස්පති හා සංවර්ත මරුත්ත, විසාලා පුරයේ ආවික්ෂිත රජතුමාට පුරෝමහිතකම් කළ බැව් කියැවේ. උෂිජා සෘෂිවරයාට දීර්ඝතමස් නමින් පුතෙක් විය. බෘහස්පති සෘෂිවරයාට භාරද්වාජ නම් පුතෙක් විය. මොහු කසී රටට ගොස් එහි දිවෝදාස රජතුමාගේ පුරෝහිතයා බවට පත් වූයේය. ඔහුගේ පුත් වූ විතත එහි රජ වූ භරත රජතුමා විසින් ඇතිදැඩි කර ගනු ලැබීම නිසා ඔහු භරත පරම්පරාවට අයිති අයකු හැටියට සැලකේ.
අඞ්ගීරස ගෝත්‍රය භාරයේ වූ වේද සංහිතාව අථර්ව වේදයයි.
පොත්පත්:
අභිධානප්පදීපිකා
මිලින්ද ප්‍රශ්නය
Pargiter, F.E. – Ancient Indion Historical Tradition
(සංස්කරණය:1963)
