අඤ්ජනා
සිංහල විශ්වකෝෂය වෙතින්
සුමේරු පර්වතයෙහි විසූ කේසරී නමැති වානර රජුගේ භාර්‍ය්‍යාව හා හනුමාන්ගේ මව වශයෙන් රාමායණයෙහි හැඳින්වේ. පූර්ව ජන්මයෙහි පුඤ්ජික ස්ථලා නම් අප්සරාවක්ව සිටි ඕතොමෝ එක්තරා ශාපයකින් කුඤ්ජර නැමති වානර රජුට දුව උපන්නීය. වායුදෙවියා නිසා ඇයට ලැබුණු පුත්‍රයා අසහාය තේජෝබල පරාක්‍රමයෙන් යුත් හනුමත් (හනුමන්)ය. අඤ්ජනා ධීරවීර ගුණ ඇත්තියක වශයෙන් රාමායණයෙහි හඳුන්වා තිබේ. එහි යුද්ධ කාණ්ඩයේ එක් තැනෙක ඇය වරුණකන්‍යකා (වරුණගේ දුව) නමින් හඳුන්වා තිබේ. අඤ්ජනම් එළි මගින් යම් යම් දේ දැනගැනීම සඳහා කරන කටයුතුවල දී ඇතැම් විට අඤ්ජන දේවියගේ සහාය අවශ්‍ය වේ.
(සංස්කරණය:1963)
