අණබෙරය
පුරාණ ඉන්දියාවේ රජවරුන් විසින් අණපනත්, නිවේදන හා ආරංචි ආදිය පතුරුවා හරින ලද්දේ අණබෙර හැසිරවීමෙන් බව ජාතක කථාවලින් හා මහාභාරතය, රාමායණය වැනි පැරණි ඉන්දියානු සාහිත්‍ය කෘතීන්ගෙන් ලැබෙන තොරතුරුවලින් පෙනේ. විජය රජුට හා ඔහුගේ පිරිසට භාර්‍ය්‍යාවන් එවීමට මධුරා පුරයේ පඬි රජුට හසුන්පත් යැවූ අවස්ථාවේ දී ඒ රජු "ලංකාවට දූන් යවනු කැමැත්තාවූ මේ මධුරා වැසි මිනිස්සු දූන් දෙගුණයක් සරසා ගෘහද්වාරයන්හි හිදුවත්වා, ඒ ලකුණෙන් උන් ඇරගන්නෙ මැ යි බෙර පියවි කැරැවී" යයි මහාවංසයෙහි සඳහන් වේ. ඉන්දියාවේ පැවති මේ අණපනත් නිවේදන ආදිය ප්‍රචාරය කිරීමේ ක්‍රමය ලංකාව ද අනුගමනය කරන්නට ඇතැ යි සිතිය හැකිය. දුටුගැමුණු රජු රුවන්මැලි සෑය ඉදිකිරීමේ කටයුතු භාරදීම පිණිස උළුවඩුවන් රැස් කරවූයේත් එහි ධාතු නිධානය පිළිබඳව මහජනයාට දැනුම් දුන්නෙත් අණබෙර ගැස්වීමෙනි. මහාදාඨීක මහානාග රජු රන්බෙර අටක් ගස්වා ඒ මගින් මහජනයා රැස් කරවා සූවිසි දහසකට මහදන් පැවැත්වූ බව ද මහාවංසයේ සඳහන් වෙයි. ඇතැම් අවස්ථාවන්හි දී රජකු රාජ්‍යප්‍රාප්ත වූ බව මහජනයාට දැන්වීම සඳහා ද අණබෙර ගස්වා ඇති බව සංඝා (බ.) කුමරිය තම වල්ලභයා වූ ඡත්තගාහකයාහට රජකම පැවරීමෙන් පසු ඒ බව බෙර පියවි කරවා මහජනයාට දැනුම් දීමෙන් පෙනේ. පැරණි සිංහල රජදරුවන් වෙහෙර විහාර ආදියට යම් යම් දේ පූජා කොට ඒ බව මහජනයාට දැන ගැනීමට සලස්වන ලද්දේ අණබෙර හැසිරවීමෙනි. වසභ රජු වැව් කිහිපයකින් රජයට ලැබුණු බොජකපති, දකපති හා මජිබිකපති නමින් හැඳින්වුණු අයබදු විහාරයකට පූජා කොට ඒ බව මහජනයාට දැන ගැනීමට සැලැස්වූයේ "සවණු බෙර පහරවා" බව පෙරුමියන්කුලම් සෙල්ලිපියෙහි සඳහන් වෙයි. නකුල නමැති ඇමතියකු විසින් කගකා පබ්බත නම් විහාරයට කරන ලද පූජාවක් ගැන මහජනයාට දැනුම් දෙනු ලැබූයේ ද "බෙර පහරවා" බව තිඹිරිවැව සෙල්ලිපියකින් පෙනේ.
අප්‍රිකාවේ ස්වදේශික ගෝත්‍රිකයන් අතර බෙර වැයීමෙන් ආරංචි පතුරුවා හැරීමේ සිරිත අද වන තුරු පවත්නා බව දක්නට ලැබේ. එහෙත් මේ බෙර වැයීම ලංකාවේ මෙන් රට පුරා ඇවිද කරන්නක් නොව යම්කිසි ස්ථානයක සිට කරන බෙර වැයීමකි. ඒ මඟින් ප්‍රචාරය කළයුතු ආරංචිය අවට ගම්වලට දැනුම් දෙනු ලැබේ. අතීතයේ දී සමහර යුරෝපීය රටවල ආරංචි පතුරුවා හරිනු ලැබුයේ ගිනිගොඩවල් ගැසීමෙනි. ට්‍රෝයි නගරය සතුරන්ට යටත් වූ බව ග්‍රීකයන්ට දැනුම් දෙන ලද්දේ කඳු මුදුන්වලට ගිනි දැල්වීමෙන් බව කියති. ඇමරිකන් ඉන්දියානුවන් විසින් ආරංචි පතුරුවා හරිනු ලබන්නේ ද දුම්ගොබ නිකුත් කිරීමෙනි.
ප්‍රචාරය පහසු කරවන නානාවිධ නවීන උපක්‍රම පහළ වීම නිසා අණබෙර ගැස්වීම මෙකල යල් පැනගිය ක්‍රමයක්ව තිබේ. අණබෙරය ද බෙහෙවින් අභාවයට පැමිණ ඇත්තේය. එහෙත් පැරණි අණබෙර ක්‍රමය තවමත් සහමුලින් මෙරටින් තුරන් නුවූ බව ඉඳහිට කරනු ලබන අණබෙර ප්‍රචාරයන්ගෙන් පෙනේ. දවුල, තම්මැට්ටම, තප්පුව ආදි වාද්‍යභාණ්ඩ අණබෙරය වශයෙන් මෙරට භාවිත කරනු ලැබේ.
(සංස්කරණය:1963)
