අධෝරක්ත කිරණ (Infra-red rays)

සුදු ආලෝකයේ වර්ණාවලිය (බ.) පෙනෙන්නේ දිග තරංග ආයාමයකින් (මි.මී. 0.0007 පමණ) යුක්ත ජම්බූල (දම්පාට) ආලෝකය දක්වා මාරු වෙන වර්ණ පටියක් වශයෙනි. මේ දෘශ්‍ය ආලෝක තරංග හැර ඊට වඩා දික් වූ ආදෘශ්‍ය තරංග ආ‍යාමවලින් යුක්ත අධෝරක්ත ප්‍රදේශයක් ඇත. දෘශ්‍ය ආලෝක තරංග අතුරෙන් වඩා කෙටි තරංග ආයාමවලින් යුක්ත දම්පාට ප්‍රදේශයට ඈතින් පාරජම්බූල (බ.) ප්‍රදේශයක් ද වෙයි. අධෝ රක්ත කිරණ ඇසට හමු වන්නේ වර්ණාවලියේ රතු කෙළවරෙහි දෘශ්‍ය කිරණ පැතිර පවත්නා ප්‍රදේශය ළඟින් ම බැහැරිනි. අධෝරක්ත විකිරණයේ අඩංගු තරංගවල ආයාම මිමී. 0.0007 පමණේ සිට මිමී. 0.4 දක්වා හෝ ඊට වඩා හෝ වන්නේය. මේ විකරණ ඉතා පහසුවෙන් හැඳින ගත හැක්කේ එහි ඇති තාපන ගුණයෙනි. රත් වූ කවර හෝ දෙයකින් අධෝරක්ත විකිරණ විහිදේ.

කළු කළ බල්බයක් සහිත සංවේදී උෂ්ණත්වමානයක් සුදු ආලෝකයේ වර්ණාවලියෙහි රතු කෙළවර ළඟ ම බැහැරින් වූ ප්‍රදේශයෙහි තැබුවහොත් උෂ්ණත්වයේ වැඩිවීමක් ඇතිවන බව පෙනේ. මෙයින් පැහැදිලි වන්නේ අධෝරක්ත ප්‍රදේශය යි කියනු ලබන ප්‍රදේශයෙහි "ශක්තිය" ඇති බවයි. මේ විකිරණය නිරීක්ෂණය කරන්නේ ද මනින්නේ ද තාප විද්‍යුත් යුග්මය (බ.),විකිරණ මයික්‍රොමීටරය, බොලොමීටරය වැනි අතිසංවේදී උපකරණළුලිනි. (විකිරණය බ.)

අධෝරක්ත ප්‍රදේශයෙන් වැඩි කොටසක් ඡායාරූපයට නැංවිය හැකිය. එහෙත් එසේ කිරීමට විශේෂ ඡායාරූප තහඩු අවශ්‍ය වේ. දෘශ්‍යාලෝකය නැති පූර්ණාන්දකාරයෙහි පවා අධෝරක්ත විකිරණයේ ආධාරයෙන් ඡායාරූප ගත හැකිය. දිගින් වැඩි ආලෝක තරංග අඩුවෙන් අවශෝෂණය වෙමින් සියුම් මීදුම විනිවිද යයි. එහෙයින් සුදුසු තහඩු ද අධෝරක්ත පෙරහනක් ද උපයෝගී කොටගෙන මීදුමෙන් වැසුණු ප්‍රදේශවල භූමිදර්ශනයන්ගේ ඡායාරූප ගත හැකිය. අධෝරක්ත කිරණවලට වීදුරු ද ජලය ද සම්පූර්ණයෙන් ම වාගේ පාරාන්ධය. ඒ හා සමකර බලන කල්හි අකාර ලුණු පාරදෘශ්‍යය.

බොහෝ ද්‍රව්‍යයන් අධෝරක්ත කිරණ තදින් අවශෝෂණය කරන හෙයින් එය යම් යම් දෙයට තාප ශක්තිය ගෙන දීමෙහි ලා ප්‍රයෝජනවත් වේ. රක්තවාතය, සන්ධි ඉදිමීම, තුනටිය රුදාව හා වකුගඩුවල අමාරු ආදියට ප්‍රතිකාර වශයෙන් අධෝරක්ත කිරණ යොදනු ලැබේ. වෙළඳ ව්‍යාපාරයන්හි දී ඉක්මනින් සායම් වේළීමටත් පාන් පිලිස්සීමටත් මේ කිරණ යොදති.

(සංස්කරණය:1963)