අනුර
මෙය සත්විසි නැකත්වලින් සතළොස් වැන්නය. අනුර නැකත සර්පාකෘති තරු සතකින් යුක්ත යයි රාත්‍රිලග්නනිරූපණයෙහි ද එබඳු තරු සතරකින් යුක්ත යයි දීපිකාටීකාවෙහි ද නෙළුම් මලක සටහනක් ඇති කරන තරු තුනකින් යුක්ත යයි වෙනත් ග්‍රන්ථවල ද දැක්වේ. ඉන්ද්‍ර මණ්ඩලයට අයත් මේ නැකත අහසේ දකුණු මාර්ගය වූ මෘග වීථියට ද සම්බන්ධ වේ. මේ නැකත උදාවී ඝටිකා දහයක් ගත වූ තැන සතර ඝටිකාවක් විෂ සහිත බැවින් ඒ කාලය අශුභයයි සලකනු ලැබේ.
ඒ ඒ දිනවල අනුර නැකත යෙදුණු කල ඇතිවන මර අවාදියෝග ගුණදෝෂ සංග්‍රහයෙහි ද මේ නැකතින් උත්පාතදර්ශන මල්වරවීම් ආදිය ඇති වූ කල්හි සිදුවිය හැකි ඵලාඵල ආදිය නක්ෂත්‍ර චූඩාමණි ආදි ග්‍රන්ථවල ද සඳහන් වේ.
චිත්‍රකර්ම, රත්න පරීක්ෂා, නක්ෂත්‍ර, නීති, කාව්‍ය, නාටකාදි ශාස්ත්‍ර ඉගෙනීමට ද, ඇතුන් හා අසුන් පිට නැඟීම, විවාහ කර්ම, පුංසවන, නාමකරණ, අන්නප්‍රාශන, කර්ණවේධන, උපනයන, ඖෂධක්‍රියා, රාජ්‍යභිෂේක, ගෘහප්‍රෙව්ශාදියට ද මේ නැකත ශුභය. මෙහි උපන් ජන්මියාට ශනිගේ නක්ෂත්‍ර මහදශාව පළමුවෙන් ඇති වේ. නැකතේ පාද හතරට න-නි-නු-නෙ යන අකුරු පිළිවෙළින් හිමි වේ. නාමකරණයේ දී උත්පත්තිය සිදුවූ නැකත් පාදයට අනුව මේ අකුරක් මුලට යොදා නමක් තබනු ලැබේ.
(සංස්කරණය:1963)
