අබ
සාමාන්‍ය අබ හෙවත් ඉන්දියන් අබ (බ්‍රසිකා ජුන්සෙයා-Brassica juncea), කළු අබ (බ්‍ර.නිග්‍රා-B. nigra), එළ අබ (බ්‍ර.අල්බා-B.alba), හා බ්‍ර. ජපොනිකා (B. japonica) ප්‍රධාන අබ විශේෂයෝය. සාමාන්‍ය අබ වනාහි අතු විහිදුවමින් අඩි 2 සිට 4 දක්වා උසට වැඩෙන වාර්ෂික පැළෑටියකි. එහි පත්‍ර තද කොළ පාටය. පහළ පත්‍ර හැඩයෙන් වීණාකාරය (lyrate). ඉහළ පත්‍ර තරමක් ආයතය (oblong). ඒකාක්ෂවල (racemes) කුඩා කහපාට ද්විලිංගික මල් තිබේ. ඵලය අඟල් 2ක් පමණ දික්වූ සාර්ෂපයකි (siliqua). පාළු ඉඩම්වල නොයෙක් විට වල් පැළෑටියක් වශයෙන් මේ අබ විශේෂය වැවේ.
ඉන්දියාවෙහි බිහාරය, උත්තර ප්‍රදේශය හා බෙංගාලය වැනි ප්‍රදේශයන්හි විශාල වශයෙන් අබ වවති. ලංකාවෙහි ද හේන්වල අබ වවනු ලැබේ. ඉන්දියන් අබ ඇටවලින් තෙල් සැලකිය යුතු ප්‍රමාණයක් මිරිකා ගත හැකිය. උතුරු ඉන්දියාවෙහි, විශේෂයෙන් ම බෙංගාලයෙහි, කෑම පිළියෙල කිරීමට බෙහෙවින් ගන්නේ අබතෙලයි. එමෙන් ම ඖෂධ වශයෙන් ද ශරීරාලේපනය සඳහා ද අබ තෙල් ගනු ලැබේ. බාල අබතෙල් පහන් දැල්වීමට ගනිති.
කළු අබ ගස අතු විහිදුවමින් අඩි 3 සිට 10 දක්වා උසට වැඩෙන වාර්ෂික පැළෑටියකි. එහි මල් තද කහපාටය. ඵලය අඟලක් පමණ දික්වූ සාර්ෂපයකි. වෙළඳාම පිණිස අබ කුඩු සාදාගන්නේ කළු අබවලිනි. සමහරවිට ඵළ අබත් ඉන්දියන් අබත් අබ කුඩුවලට මිශ්‍ර කර තිබේ. කළු අබ ඇටවලින් ලැබෙන තෙල් සබන් සෑදීමට ද පහන් දැල්වීමට ද අභ්‍යඤ්ජකයක් (බ.) වශයෙන් පාවිච්චි කිරීමට ද ගනු ලැබේ. නිර්වරණ වූ හෝ ළා කහපාට වූ හෝ වාෂ්පශීල තෙලක් (essential oil) ද කළු අබ ඇට වලින් සාදාගනු ලැබේ. ප්‍රධාන වශයෙන් ඇලයිල් අයිසොතයොසයනේට් නමැති රසායන සංයෝගයෙන් සමන්විත වූ මේ වාෂ්පශීල තෙල ඖෂධ පිණිස පාවිච්චි කරනු ලැබේ. මීට සමාන වාෂ්පශීල තෙලක් ඉන්දියානු අබවලිනුත් ලැබේ.
එළ අබ ඇට සුදුය. අබතෙල් සෑදීමට එළ අබ සාමාන්‍යයෙන් නොගැනේ. එළ අබවල තිබෙන වාෂ්පශීල තෙල් ප්‍රමාණය ඉතා ස්වල්පය. කළු අබ හා මිශ්‍ර කොට එල අබ ප්‍රයෝජනයට ගනිති. එළ අබ කොළ සලාද පිණිස ද ගනිති. ඇතැම් රටවල බ්‍ර.ජපොනිකාවල කොළ ද සලාද පිණිස ගනු ලැබේ. බ්‍ර.නපිපෝම්ස්වල ප්‍රධාන මුල මහත්වී ට’නිජ් අලයක් මෙන් වැඩේ. මෙය ද කෑමට ගනු ලැබේ.
ආයුර්වේද මතය: අබවලට ආයුර්වේදයෙහි නම් කිහිපයක් ඇතත්, සර්ෂප හා සිද්ධාර්ථ යන නම් දෙක ප්‍රධාන වේ. (1) ගෞරසිද්ධාර්ථ (හෙළ අබ නොහොත් සුදු අබ) ය. (2) රක්තසිද්ධාර්ථ (රතු අබ) ය. (3) කෘෂ්ණරාජිකා (කළුඅබ) ය, (4) රාජිකා යයි අබ ප්‍රභේද සතරකි.
සුදු අබ මඳක් උණුසුම් ය, වා සෙම් පහකරයි; කණ්ඩු, කෘමි, ආම, කුෂ්ඨ හා කර්ණශීර්ගත වාත රෝග ද නසයි.
රතු අබ තික්තය; කුළුය; ස්නිග්ධය; අතිශයින් උෂ්ණය; හෙළ අබවලට සමාන ගුණ ඇත්තේය. කළු අබ අතිශයින් තියුණුය; සෙම්පිත් නසයි; රත්පිත් උපදවයි; ගිනි වඩයි; කණ්ඩු, කුෂ්ඨ හා කෘමීන් පහ කෙරෙයි. රාජිකා කුළුය; තික්තය; උණුසුම්ය; කෘමීන් හා සෙම් පහකරයි; ආහාර රුචිය හා පිත වඩයි; දෘෂ්ටිය හා වස්තිය දූෂණය කෙරෙයි; වාත ශූල දිනයි; පිත්, දාහ, ගුල්ම, කණ්ඩු, කුෂ්ඨ ව්‍රණ සුව කෙරෙයි.
රතු සුදු අබ දෙවර්ගය ම එක සමාන ගුණ ඇතැයි සඳහන් වුව ද සුදු අබ උතුම් යයි ද මතයකි. ඌරු ස්තම්භ, මූත්‍රාධික්‍ය, ශ්ලීපද, අපස්මාර, උන්මාද සන්නිපාතජ්වර, වාතරක්ත, කුෂ්ඨ හා දන්ත රෝගාදියට ප්‍රතිකාරයක් වශයෙන් අබ සාමාන්‍යයෙන් යොදනු ලැබේ.
අබ තෙල් කුළුරස ද උෂ්ණ ද වෙයි. රත්පිත් දූෂ්‍ය කෙරෙයි. සෙම, ශුක්‍ර හා වාතය දුරුකරයි. කැසීම හා පණුරෝග සුවකරයි. අබ ඇට අඹරා සාදාගන්නා ලද කල්කය තලතෙලෙහි කලතා සිඳිනු ලබන බෙහෙත් තෙල් වර්ග ද ඇත්තේය. සිද්ධාර්ථ තෛලය අබ කල්කය යොදා සාදාගනු ලබන බෙහෙත් තෙලකි. වාතරෝගයන්ට සුප්‍රසිද්ධ වූ මහාසිද්ධාර්ථ තෛලයෙහි කල්කයට ප්‍රධාන වශයෙන් ගනු ලබන්නේ අබය.
ශ්වසනක සන්නිපාත (නිවුමෝනියා) රෝගීන්ට පපුවෙහි පැලැස්තර දැමීම සඳහා අබ චූර්ණය ගනු ලැබේ. අබ කුඩු ජලයෙහි දිය කොට පෙවූ විට වමනය උපදී. විෂ කැවුණු විට ද බීමෙන් මත් වූ විට ද වමනය ඇති කිරීමට මෙය යෝග්‍යය. එළ අබ ශුභ සම්මත වස්තුවක් හැටියට භාවිත වූ බව ලදපස්මල් අතුරෙහි එය ඇතුළත් වීමෙන් පෙනේ.
(සංස්කරණය:1963)
