අම්හාරික භාෂාව

ඉතියෝපියාවෙහි (ඇබිසීනියාවෙහි) ව්‍යවහාර වන ප්‍රධාන භාෂාවය. ‍ඉතියෝපියානු භාෂා සමූහයෙන් එකක් වූ මෙම භාෂාව සැමිටික් පවුලට අයත්ය. දැනට අම්හාරික භාෂාවේ සැමිටික් වියරණ සම්ප්‍රදායට අයත් ප්‍රධාන ලක්ෂණ විද්‍යමාන වෙතත් වචන මාලාවෙහි සැමිටික් වචන අර්ධයකට වඩා නැති තරම්ය. නැගෙනහිර සැමිටික් හෙවත් කුෂ්ටික් පවුලට අයත් වචන මහත් රාශියක් වර්තමාන අම්හාරික භාෂාවෙහි වේ. කෙසේ වුව ද අම්හාරික භාෂාව අරාබි භාෂාව හැරුණු විට සැමිටික් පවුලට අයත් වඩා ම ප්‍රචලිත භාෂාව හැටියට වාග්විද්‍යාඥයෝ සලකති.

අම්හාරික භාෂාව ඉතියෝපියාවේ ව්‍යාප්ත වන්ට වූයේ 13 වැනි සියවසින් පසු පැරණි ඉතියෝපියානු ගීඑස් (Ge'ez) නම් භාෂාව කථා ව්‍යවහාරයෙන් ඉවත් වී යෑමෙන් පසුවය. එහෙත් ගීඑස් භාෂාවේ අකුරු මේ දක්වා මේ අම්හාරික භාෂාවෙහි භාවිත කරනු ලැබේ. මේ භාෂාවෙන් සාහිත්‍ය කෘති ලියවෙන්නට වූයේ යුරෝපීය මිෂනාරීන් ඇබිසීනියාවට ආවාට පසුය. දැනට විද්‍යමාන පැරණි ම සාහිත්‍ය කෘති නම් 14 වැනි සියවසට අයත් අධිරාජවරුන් පිළිබඳ ස්තෝත්‍රගීතය.

(සංස්කරණය:1963)