අමීර්ඛාන්-2
ඉන්දියාවේ මධ්‍ය ප්‍රදේශවාසී පඨාන් ගෝත්‍රිකයන්ගේ නායකයා වශයෙන් ද පින්දාරි (බ.) ගෝත්‍රිකයන්ගේ කුලුපග මිත්‍රයකු හා උදව් කාරයකු වශයෙන් ද හැඳින්වෙන මොහු ටොන්ක් ප්‍රදේශයේ ප්‍රථම නාවාබ්රවයාය. 1799 පමණේ සිට ජස්වන්ත් රාවෝ හොල්කාර් (බ.) නමැති මරාඨ අධිපතියකු යටතේ මොහු පළමුවෙන් යුද්ධ හමුදාවේ සේවය කළේ ය. එහෙත් වැඩි කලක් යන්නට මත්තෙන් ඉන් අස්වූ ඔහු පින්දාරිවරුන් හා එක්වී ඉංග්‍රීසීන්ට යටත්ව තුබූ ප්‍රදේශවලට ගොස් මංපැහැරීමටත් මිනිසුන්ගේ වස්තුව කොල්ලකෑමටත් පටන් ගත්තේ ය. මෙය නතර කිරීමට අදහස් කළ ඉන්දියාවේ බ්‍රිතාන්‍ය පෙරදිග වෙළඳ සමාගමේ ආණ්ඩුව ඔහු සමඟ සාකච්ඡා පවත්වා 1817 නොවැම්බර් මාසයේ දී සාම ගිවිසුමකට අත්සන් තැබිය. මේ ගිවිසුම අනුව බ්‍රිතාන්‍ය ජාතිකයන් හා ජස්වන්ත් රාවෝ හොල්කාර් විසින් මොහුටොන්ක් ප්‍රදේශයේ නවාබ්වරයා හැටියට පිළිගන්නා ලදි. මහත් අවුල් වියවුල් ඇති කරමින් රට කැළඹු පින්දාරි ගෝත්‍රිකයන්ට මේ සාම ගිවිසුම නිසා අමීර්ඛාන්ගේ ආධාර නොලැබී ගියේ ය.
ක්‍රි.ව.1834 දී පමණ අමීර්ඛාන්ගේ මරණය සිදුවිය. බසාවන් ලාල් නැමැති හින්දු ජාතිකයකු විසින් ලියන ලද අමීර්ඛාන්ගේ ජීවිත කථාව තෝබි ප්‍රින්සෙප් නමැත්තෙකු විසින් ඉංග්‍රීසියට පරිවර්තනය කොට ඇත.
(සංස්කරණය:1963)
