අඹවෙල

ලංකාවේ නුවරඑළි දිස්ත්‍රික්කයේ පිහිටි ගමකි. නුවරඑළියට සැතැපුම් හතක් ගිනිකොනින් පිහිටි අඹවෙල උඩරට දුම්රිය මාර්ගයේ නැවතුම් පළකි. කොළඹ සිට දුර සැතැපුම් 110කි. මධ්‍යම කඳුකරයේ පිහිටි මෙය මූදු මට්ටමේ සිට අඩි 6,000ක් පමණ උසය. අඹවෙල ලංකාවේ වැදගත් කෘෂිකර්ම මධ්‍යස්ථානවලින් එකකි. තණකොළ සරුවට වැවෙන කඳුබෑවුම් අතරෙහි පිහිටි මෙහි ප්‍රධාන වශයෙන් ගවයන් ඇති කරත්. අයර්ෂයර් වර්ගයට අයත් කිරි දෙනුන් ද ඌරන් ද ඇති කිරීමත් කිවයුතු විශේෂ කරුණකි. උන්ගේ ආහාර සඳහා කිකුයු තණ, රාබු, බඩ ඉරිඟු ආදිය ද වවති. මේ ප්‍රදේශයේ සිසිල් තෙත් දේශගුණය යථෝක්ත කටයුතුවලට හිතකරය. අවට ප්‍රදේශයෙන් විශාල කොටසක් කඳුකර කැළෑවෙන් වැසී පවතී. ප්‍රධාන වැවිල්ල තේ ය. ලංකාවේ උස ම කඳුකුළු අතරින් තෙවැන්න වූ තොටුපොළ කන්ද (අඩි 77541) අඹවෙලට සැතැපුම් තුනක් පමණ දකුණින් පිහිටා තිබේ.

(සංස්කරණය:1963)