අයික්මාන්, ඇඩොල්ෆ්
දෙවන ජගත් සංග්‍රාමයෙන් ජර්මනිය පරාජය වීමෙන් පසු 1945 සිට 1960 මැයි මාසය දක්වා අවුරුදු පසළොසක් පමණ කාලය තුළ අයික්මාන් සැඟවී සිටියේය. යුදෙව්වරු ඊශ්‍රායෙල් රාජ්‍යය පිහිටු වූ පසු රහස් පරීක්ෂකයන් යොදවා ලොව පුරා මොහු සෙවීමේ යෙදී සිටියහ. ව්‍යාජ නාමයකින් පෙනී සිටි අයික්මාන් ඇමෙරිකානු සිරකඳවුරෙක මාස කීපයක් ම ගත කළේය. එහෙත් ඔවුන් විසින් හඳුනාගැනීමට ප්‍රථම හේ ඉන් පලා ගියේය. අයික්මාන් අල්ලා ගන්නා ලද්දේ ආර්ජන්ටිනාවේ දී වෙස්වලා ගෙන සිටිය දීය. ඊශ්‍රායෙල්වරුන් විසින් ආර්ජන්ටිනාවට නොදන්වා ම ඔහු ඊශ්‍රායෙලයට ගෙන යනු ලැබ එහි සිර කරන ලදි.
මොහුගේ නඩු විභාගය 1961 අප්‍රේල් 11 වැනි දින යෙරුසලමේ ඊශ්‍රායෙල් අධිකරණයක රජතුන්කට්ටුවක් ඉදිරියෙහි ආරම්භ කරන ලදි. අයික්මාන් විශේෂ හමුදා රැකවරණ ඇතිව වෙඩි නොවදින විත්ති කූඩුවකට කැඳවාගෙන එනු ලැබීය. නඩු විභාගය පිළිබඳ සියලු විස්තර රූපවාහිනිය මගින් ප්‍රචාරය කිරීමටත් නඩුව විභාග කරනු නැරඹීම සඳහා පුවත්පත් කලාවේදීන් හාරසියයකටත් විදේශීය නිරීක්ෂකයන් හා මහජන නියෝජිතයන් හය සියයකටත් පහසුකම් සලසා තිබිණි. ජර්මනියේත් බටහිර යුරෝපයේ අනික් රටවලත් හැට ලක්ෂයක් පමණ යුදෙව්වන් දෙවැනි ලෝක සංග්‍රාම සමයේ දී මරා දැමීමට අණ කිරීමත් ඊට සහභාගි වීමත් සම්බන්ධයෙන් අයික්මාන්ට එල්ල වූ චෝදනා පසළොසකි.
අයික්මාන්ට විරුඬව නඩු විභාග කිරීමට ඊශ්‍රායෙල් රාජ්‍යයට බලයක් ඇද්ද යන්න ගැන ලෝකමතය විවිධ විය. එක්සත් අරාබි ජනරජය වැනි අරාබි රටවල් අයික්මාන් හිරභාරයට ගැනීම ගැනත් ඔහුට විරුඬව නඩු පැවරීම හා නඩු විභාගයක් පැවැත්වීම ගැනත් ඊශ්‍රායෙලය දැඩි විවේචනයට භාජන කෙළේය.
මෙම නඩුවෙන් අයික්මාන් වැරදිකරු හැටියට තීරණය කරනු ලැබ ඔහුට මරණ දණ්ඩනය නියම විය. අයික්මාන් ඊට විරුද්ධව ගත් ඇපෑල නිෂ්ප්‍රභ වූයෙන් 1962 මැයි මාසයේ දී ඔහු එල්ලා මරනු ලැබීය.
(සංස්කරණය:1963)
