අල්මේරියා
දකුණු ස්පාඤ්ඤයේ පළාතක් ද එම පළාතෙහි අගනුවර ද ඒ ඉදිරිපිට තිබෙන බොක්ක ද අල්මේරියා නමින් හැඳින්වේ.
අල්මේරියා පළාත කඳුවලින් ගහනය. මෙහි ඇති සියෙරා අල්හමිල්ලා, සියෙරා දෙ ලෝස් ෆිබ්‍රෙස් සහ සියෙරා දෙ ලාස් එස්තන්සියාස් යන කඳු වැටි අඩි 6,000කටත් වඩා උසය. ආල් මාන්සේරා, ආගුවාස්, අල්මේරියා සහ ආද්‍රා යන ගංගා බොහෝ දුරට හෑරී ගිය නිම්න මැදින් ගලා ගොස් මධ්‍යධරණී මුහුදට වැටේ. මෙහි දේශගුණය වියළිය. පටු මුහුදුබඩ තැනිතලාවෙහි වාර්ෂික වර්ෂාපතනය අඟල් 10කි. ජලසම්පාදනයෙන් වගා කරනු ලබන කෙත්වතුවල ධාන්‍ය වර්ග ද දොඩම් සහ මිදි ද වවත්. කඳුකරයෙහි බැටළුවන් ඇති කරත්. යකඩ, ඊයම්, රසදිය, රිදී, තඹ, රන් සහ කිරිගරුඬ ප්‍රධාන ඛනිජය. මේ ප්‍රදේශයෙහි ගමනාගමන පහසුකම් හිඟය. වර්ග සැතැපුම් 3,388ක් විශාල වූ මෙහි ජනගහනය (1950) 361,769කි. රෝමන් සමයෙහි පටන් වැදගත් නැව්තොටක් වූ අල්මේරියා නගරය දියුණු වූයේ මුස්ලිම් පාලනය යටතෙහිය. නගරයේ ගෘහ නිර්මාණ ශිල්පයෙහි ද මුස්ලිම් බලපෑම කැපී පෙනේ. කලෙක මෙය මුස්ලිම් මුහුදු කොල්ලකරුවන්ගේ මධ්‍යස්ථානයක් ද විය. යකඩ, ඊයම් සහ පලතුරු පිටරට යවන ප්‍රධාන ද්‍රව්‍යය. ජනගහනය (1950) 75,861කි.
(සංස්කරණය: 1965)
