අල්ලකප්ප
සිංහල විශ්වකෝෂය වෙතින්
බුද්ධ කාලයෙහි මගධ රටට ආසන්න ව පිහිටා තුබුණේ යයි සැලකෙන ප්‍රදේශයකි. ධම්මපදට්ඨකථාවෙහි දැක්වෙන පරිදි මේ ප්‍රදේශයේ භූමි ප්‍රමාණය යොදුන් දහයක් පමණ විය. එය සමූහාණ්ඩුවකට හුරු පාලනයක් යටතෙහි පැවති සේ පෙනේ. මේ ප්‍රදේශය පාලනය කරන ලද්දේ බුලි වංශික රජුන් විසිනි. මහා පරිනිබ්බාන සූත්‍රයෙහි දැක්වෙන පරිදි බුදුන් පිරිනිවන් පෑ අවස්ථාවේ දී උන්වහන්සේගේ ශාරීරික ධාතූන්ගෙන් කොටසකට බුලීන් හිමිකම් කීවේ ඔවුනුදු බුදුන් වහන්සේ මෙන් ක්ෂත්‍රිය වංශයට අයත් වූවන් බැවිනි. ඔවුන් ලබාගත් ධාතු කොටස නිදන් කොට ඔවුන්ගේ රටේ ස්තූපයක් බැඳ වූ බැව් ද මහා පරිනිබ්බාන සූත්‍රයෙහි සඳහන් වේ. මේ ප්‍රදේශය වේඨදීප රාජ්‍යයට ආසන්නව පිහිටියේ යයි සිතිය හැකි නමුත් එය නියම වශයෙන් කොතැනක වී දැයි තවමත් නිශ්චය කොට නොමැතියි.
(සංස්කරණය: 1965)
