අල් මුතන්නබි
(915-965). අල් මුතන්නබි හෙවත් අහමද් ඉබ්න් හුසේන් ඉස්ලාමික කවියෙකි. කූෆා පුරයෙහි දිය අදින්නකුගේ පුතකුව ඉපදී දමස්කස් නුවර අධ්‍යාපනය ලැබූ මොහු තමා ආගම් වක්තෘවරයකු බව ප්‍රකාශ කෙළෙන් කලකට බන්ධනාගාරයට යවන ලදි. ආගම අතින් නිදහස් මත දරුවකු වූ මොහු උපවාසය, යාච්ඤා කිරීම සහ කුරාන් පොත කියැවීම ආදි සම්මත වත් පිළිවෙත් කෙරෙහි ආශාවක් නොදැක්වීය. අලෙප්පෝවේ සයිපු රාජයාගේ ජයග්‍රහණ මනහර ලෙස පද්‍යයට නැඟීමෙන් පසු හේ අතිශයින් ජනප්‍රිය කිවියකු බවට පත්විය. පසු කලෙක දී ඒ රජු හා අමනාප වී අලෙප්පෝ නගරය හැර දමා මිසරය, බැබිලෝනියාව ආදි රටවල සංචාරය කළ ඔහු සොර මුළකට අසු වී මරුමුවට පත් විය.
ඔහුගේ කාව්‍ය ප්‍රබන්ධ මනහර වාග් විලාසයෙන් ද මිහිරි ශබ්දඝටනාවෙන් ද විචිත්‍ර අලංකාරයෙන් ද යුක්තය. අරාබි කාව්‍යාවලියේ අතිශ්‍රෙෂ්ඨ අවධිය දක්වන කිවියන් දෙදෙනාගෙන් මෙතෙමේ එක් තැනැත්තෙකි. ඔහුගේ 'දීවාන්' ප්‍රබන්ධය මුළු අරාබි සමාජය ම ඉතා අගනා කෘතියක් හැටියට සැලකූහ.
(සංස්කරණය: 1965)
