අසරණ සරණ සමිති
අසරණ ජනයාට උදව් උපකාර කිරීම සඳහා පිහිටුවා ඇති සමාගම් සෑම ශිෂ්ට සමාජයක ම දක්නට ලැබේ. රජයේ ආධාර ඇතිව හෝ නැතිව හෝ පවත්වාගෙන යන අසරණ සරණ සමිති මගින් සමාජ ශුභ සාධනය සහ ප්‍රගතිය සඳහා ඉටුවන්නේ ඉමහත් සේවයකි. කායික හා මානසික දුබලතාවන්ගේ හේතුවෙන් දුකට පත් අයට පමණක් නොව නොයෙකුත් ආර්ථික හේතූන් නිසා දිවි පෙවෙත ගෙනයා නොහැකි දුගියනට පිහිටවීම අසරණ සරණ සමිතියක ප්‍රධාන අරමුණ වේ. අසරණයන්ට සරණ වීම පෙර අපර දෙදිග ම ඈත අතීතයේ සිට පැවත ආ මහඟු සිරිතක් වුව ද සංවිධානය වූ සමිති සමාගම් ඇතිවන්නට වූයේ දහනවවන සියවසේ අග කොට සේ දීය. ක්‍රි.ව. 1869 දී එංගලන්තයේ ද වර්ෂ 1877 දී ඇමෙරිකාවේ ද ප්‍රථම වරට අසරණ සරණ සමිති දෙකක් ඇරඹුණු බව සඳහන් වේ. අප රටෙහි අසරණ සරණ සමිතිවල මූලාරම්භය කවර කලෙක වීදැයි නිශ්චය වශයෙන් කිව නොහැකි නමුත් මෙහි ප්‍රධාන සමිති දැනට අවුරුදු සියයකට ඉහත සිට පැවත එන බව දක්නට ලැබේ. වර්ෂ 1831 දී සර් එඩ්වඩ් බාන්ස් ලකිසුරුතුමන්ගේ අනුශාසකත්වය ඇතිව කොළඹ දී පළමුවරට අසරණ සරණ සමිතියක් ඇරඹිණ. එවකට මදුරාසියේ පැවති අසරණ සරණ සමිතියක් දුටු කල්කටාවේ බිෂොප්තුමාණෝ අප රටෙහි මෙවැනි සමිතියක් පිහිටුවීමේ අවශ්‍යතාව පෙන්වා දුන්හ. කොළඹ ප්‍රධාන අසරණ සරණ සමිතිය ඇරඹීමෙන් අනතුරුව මොරටුව, ගාල්ල, මහනුවර, යාපනය, ත්‍රිකුණාමලය, පුත්තලම සහ කෑගල්ල ආදී නගරවල ශාඛා සමිති බිහිවූහ. අසරණ සරණ සමිති මගින් කෙරෙන සේවා ආභ්‍යන්තරික හා බාහිර වශයෙන් දෙකොටසකට බෙදිය හැකි වෙයි. රෝගීන්, වෘද්ධයන් සහ අනාථ ළමයින් සඳහා නිවාස පහසුකම් සැලසීම ආභ්‍යන්තරික සේවය වශයෙන් කෙරෙන අතර පිහිට සොයා එන අසරණ අයට මිලමුදලින් සහ අන් අයුරින් ආධාර කිරීම බාහිර සේවයක් වශයෙන් කෙරේ. මේ උභය සේවය සඳහා රජය සමාජ සේවා දෙපාර්තමේන්තුව මගින් ඒ සමිති වලට ආධාර කරයි. කොළඹ සහ අනිකුත් ප්‍රධාන නගරවල පිහිටුවා ඇති අසරණ සරණ සමිතිවල නඩත්තුව සඳහා රජය මගින් ගෙවනු ලබන ආධාර මුදල ඒ ඒ සමිතිවලට අවුරුදු පතා ලැබේ. ස්වේච්ඡා සේවක ආයතන මගින් පවත්වාගෙන යන අනාථ නිවෙස්වල නිවාස පහසුකම් ලබන එක් අයකු වෙනුවෙන් වසකට රුපියල් 240/- වන සේ රජය මගින් මසක් පාසා රුපියල් 5,40,000/-ට අධික මුදලක් වැය කෙරේ. මේ හැර නොයෙකුත් සමිති සමාගම් මගින් බාහිර ආධාර සඳහා වියදම් කෙරෙන මුදල් සලකා රජය ඒ ඒ සමිති සමාගම්වලට විශේෂ ආධාර ද දෙයි. රජයේ ආධාර හැර අමතර වශයෙන් පොදු මහජනයාගෙන් මෙම සමිති වලට නිතර ආධාර ලැබේ. කොළඹ අසරණ සරණ සමිතියට මෑතක් වන තුරු ම කොළඹ නගර සභාවෙන් ද ආධාර මුදලක් ලැබිණ. කොළඹ නගර සීමාව තුළ නිත්‍ය පදිංචියක් නැතිවීමෙන් හෝ අන් කරුණක් නිසා හෝ නගර සභාවෙන් ආධාර ලබා ගැනීමට නොහැකි අයට මුදලින් ආධාර දීම ද රෝගීන්ට බෙහෙත් ද්‍රව්‍ය ගැනීමට උපකාර කිරීමද දුගී ළමයින්ට ටයිප් ගැසීම, ලඝු ලේඛනය ආදී වෘත්තීය පුහුණුවක් ලබාදීම ද කොළඹ අසරණ සරණ සමිතිය මගින් දැනට කෙරෙන විශේෂ සේවාවෝයි. මේ හැර ප්‍රතිකාර ගැනීම සඳහා කොළඹට පැමිණෙන අංගවිකලවූවන්ගේ ප්‍රයෝජනය පිණිස එකවර 30 දෙනකුට නවාතැන් ගත හැකි නේවාසිකාගාරයක් ද තනා තිබේ. මෙම නේවාසිකාගාරයට ඇතුළත් කිරීම කොළඹ විකලාංග චිකිත්සාගාරයේ ප්‍රධාන ශල්‍ය වෛද්‍යවරයාගේ උපදෙස් අනුව කරනු ලැබේ. මහලු නිවාස හා ළමා නිවාස නඩත්තු කිරීම, අවමංගලාධාර ගෙවීම ආදිය අනෙකුත් අසරණ සරණ සමිති මගින් කෙරෙන විශේෂ සේවා කීපයකි. ආගම් භේද ජාති භේද හා කුල භේද නොතකා සැමට එකසේ පිහිට වීම අසරණ සරණ සමිති මගින් කෙරෙන සේවයේ විශේෂ ලක්ෂණයකි. මෙම සමිතිවල සාමාජිකත්වය පන්ති භේදයන්ගෙන් තොරව පොදුවේ කාටත් දැරිය හැකි බැවින් මිනිස් සමාජයට අවශ්‍ය වටිනා සේවයක් මෙම සමිති වලින් ඉටු වේ. අසරණ සරණ සමිති සංවිධානය සියලු භේදයන්ගෙන් තොරව පවතින බැවින් ඉන් සමාජයට ඉටුවන සේවය අප්‍රමාණ බැව් කිව යුතුය. වේතනය සඳහා සේවය කරන ටික දෙනකු හැර අසරණ සරණ සමිතිවල සේවය කරන බොහෝ දෙන ස්වේච්ඡා සේවකයෝ වෙත්. ගිලානෝපස්ථාන හා නේවාසිකාගාර වැඩ කටයුතු ආදිය උදෙසා විශේෂ පුහුණුවක් ලත් අය ලබාගන්නා අතර අන් සියලු කටයුතු සාමාන්‍යයෙන් සමිතියේ සාමාජිකයන් විසින් ම සිදුකෙරේ. වැටුප් ලබන සේවකයෝ වැඩි වශයෙන් ම ප්‍රධාන සමිති යටතේ සේවය කරත්. ස්වේච්ඡා සේවය පිණිස වෛද්‍යවරු ද ගණන් පරීක්ෂකවරු ද අසරණාධාර අයදුම්පත් ගැන සොයා බැලීමට ප්‍රදේශ භාර පරීක්ෂකවරු ද පත් කරනු ලැබෙත්. බොහෝ සමිතිවල එක් එක් කාර්යය සඳහා විශේෂ කාරක සභා ද පත්කර ඇත. සමාජ සේවා කටයුතු සාර්ථක ලෙස කිරීමට රජය සහ පළාත් පාලන සභා මෙන් ම ස්වේච්ඡා සේවක ආයතන ද අවශ්‍ය මය. උස්මිටි කම් නොතකා සැමට එකසේ පිහිට වීමට ඉඩ සලසන අසරණ සරණ සමිති ව්‍යාපාරය දිනෙන් දින ම පළාතෙන් පළාතට පැතිර යමින් පවතී. විශේෂයෙන් නොදියුණු ගම්වල අසරණ සරණ සමිති මගින් කළ යුතු දෑ බොහෝය. අධ්‍යාපනය රැකීරක්ෂා, නිවාස පහසුකම් ආදී විවිධ අරමුණු උදෙසා අසරණ සරණ සමිති පිහිටුවා ගත හැක. මෙවැනි පොදු සේවයන් උදෙසා පවත්වා ගෙන යන ඕනෑ ම අසරණ සරණ සමිතියකට රජයේ අනුමැතිය සහ අනුග්‍රහය නිතර ලැබේ.
(සංස්කරණය: 1965)
[[ප්‍රවර්ගය:]]
[[ප්‍රවර්ගය:]]
