ආගරපතන

නුවරඑළි දිස්ත්‍රික්කයේ කොත්මලේ කොට්ඨාසයෙහි දිඹුල කෝරළේ පිහිටි කුඩා නගරයකි. නාවලපිටිය-දියගම පාරේ 37 වැනි සැතැපුම් කණුව පිහිටා ඇත්තේ මෙහිය. ආගරපතන හා අවට පෙදෙස් මුහුදු මට්ටමේ සිට අඩි 4,500-5,000ක් උසය. ආගරපතන යන නාමයෙන් හැඟෙන පරිදි ස්වභාවයෙන් ඉලුක් හා මානා පඳුරුවලින් වැසීගිය පතන් පෙදෙසක්ව පැවති මෙහි තේ වගාව ඉතා දියුණු වී ඇති හෙයින් දැනට දක්නට ලැබෙන්නේ ස්වල්ප වශයෙනි. ආගර පතන නගරයෙහි වෙළෙඳ කටයුතු විශේෂයෙන් ම තේ වතුවල ජනයාගේ අවශ්‍යතාවන් පිරිමසාලීමට සරිලන සේ හැඩගැසී ඇත. කොත්මලේ ඔයේ අතුගංගාවක් වන අග්‍රා ඔය (අවර ඔය) ආගරපතන අසලින් ගලා බසී. මසුන් බිළී බෑම සම්බන්ධයෙන් අග්‍රා ඔය වතුකරයේ විනෝදකාමීන් අතර ප්‍රසිද්ධය. තැපැල් කාර්යාලයක් හා කුඩා ආරෝග්‍ය ශාලාවක් ද බෞද්ධ, හින්දු, මුස්ලිම් හා ක්‍රිස්තියානි පූජනීය ස්ථාන ද ආගරපතනෙහි තිබේ.

(සංස්කරණය: 1965)