ආනන්ද මත්ස්‍යයා
සිංහල විශ්වකෝෂය වෙතින්
බෞද්ධ සාහිත්‍යයෙහි සඳහන් විශාල මත්ස්‍යයෙකි. ඇතැමුන්ගේ පිළිගැනීම පරිදි ආනන්ද මත්ස්‍යයා වශයෙන් ගැනෙනුයේ ආඳායි. ඌට සර්පයකුට බඳු හිසක් ද මත්ස්‍යයකුට බඳු වාලධියක් ද ඇත. ඌ මසුන් අතර දී නගුට ද සපුන් මැද දී හිස ද පෙන්වීමෙන් උනුන්ට සමාන බව හඟවා කපටිකමින් සිය අදහස් සිදු කර ගන්නේල. සසුන්ගත වූ කෛරාටික පුද්ගලයා සුත්තන්තික ආභිධම්මික දෙපක්ෂයේ ම සිත් සතුටු කිරීමට තැත් කරන හෙයින් ආනන්ද මත්ස්‍යයාට උපමා කරනු ලැබේ. යොදුන් පන්සියයක් දිග ඇති ආනන්ද නම් මත්ස්‍යයකු පිළිබඳ විස්තරයක් සුතසෝම ජාතකයෙහි දක්නට ලැබේ.
(සංස්කරණය: 1965)
