ආර්ද්‍රතාව
ආර්ද්‍රතාව යනු වාතයෙහි ඇති තෙතමනයේ හෙවත් ජල වාෂ්පයේ ප්‍රමාණයයි. වාතය හා ගැටෙන සෑම දිය මතු පිටකින් ම, සෑම තෙත තැනකින් ම නිරතුරුව වාෂ්පීභවනය (බ.) සිදුවෙයි. වාතයේ ආර්ද්‍රතාව පරිමා ඒකකයක ඇති ජල වාෂ්පයේ බරින්, එනම් ඝන මීටරයකට ග්රෑම්වලින්, ප්‍රකාශ කළ හැකියි. මෙය නිරපේක්ෂ ආර්ද්‍රතාව නම් වෙයි. මෙය ඇතැම් විට ප්‍රතිශතයක් ලෙස ද දැක්වෙයි. ජල වාෂ්ප සියල්ල ම උරා ගන්නා අවශෝෂක ද්‍රව්‍යයක් අඩංගු නළයක් තුළින් නියමිත වාත ප්‍රමාණයක් යවා අවශෝෂණයට පෙරත් පසුත් ඒ නළයේ බර කිරා ගැනීමෙන් නිරපේක්ෂ ආර්ද්‍රතාව නිර්ණය කළ හැකියි.
වාතයෙහි අඩංගු ජල වාෂ්ප ප්‍රමාණය එහි උෂ්ණත්වය අනුව වෙනස් වෙයි. සීතල වාතයට වඩා ජල වාෂ්ප දරා ගැනීමේ හැකියාවක් උණුසුම් වාතයට ඇත. තෙත් වාතයෙහි උෂ්ණත්වය අඩු කළ විට එම වාතය ජල වාෂ්පයෙන් සන්තෘප්ත කිරීමට සෑහෙන තෙතමනයක් ඇති උෂ්ණත්වයක් දක්වා එය ඉක්මනින් සිසිල් වෙයි. වාතය මීටත් වඩා සිසිල් කළ විට ජල වාෂ්ප ඝන වී පිනි හෝ තුහින හෝ සෑදෙයි.
නිරපේක්ෂ ආර්ද්‍රතාවට වඩා සාපේක්ෂ ආර්ද්‍රතාව නොයෙක් වැඩට ප්‍රයෝජනවත්ය. යම්කිසි උෂ්ණත්වයක දී වාතයෙහි නියම වශයෙන් අඩංගු ජල වාෂ්ප ප්‍රමාණයත් එම උෂ්ණත්වයේ දී වාතය සන්තෘප්ත කිරීමට අවශ්‍ය ජල වාෂ්ප ප්‍රමාණයත් අතර අනුපාතය එම උෂ්ණත්වයෙහි සාපේක්ෂ ආර්ද්‍රතාව නම් වෙයි. මෙය වාතයේ අඩංගු ජල වාෂ්පවල සැබෑ පීඩනයත් එම උෂ්ණත්වයේ දී ජල වාෂ්පවල උපරිම හෙවත් සන්තෘප්ත පීඩනයක් අතර අනුපාතය ලෙස ද දැක්විය හැකියි. සාපේක්ෂ ආර්ද්‍රතාව සාමාන්‍යයෙන් ප්‍රතිශතයක් වශයෙන් සඳහන් කැරෙයි.
වාතය සන්තෘප්ත කිරීමට අවශ්‍ය ජල වාෂ්පවලින් අඩක් පමණක් ඇති විට වාතයේ සාපේක්ෂ ආර්ද්‍රතාව 50%ක් වේ. තුෂාර අංකයේ (තුෂාර අංකය බ.) දී සාපේක්ෂ ආර්ද්‍රතාව 100%කි. අමුතුවෙන් ජල වාෂ්ප එකතු නොවී උෂ්ණත්වය වැඩි වන විට සාපේක්ෂ ආර්ද්‍රතාව අඩු වෙයි. එහෙත් නිරපේක්ෂ ආර්ද්‍රතාව අඩු නොවෙයි. ජල වාෂ්ප එකතු නොවී උෂ්ණත්වය අඩු වන විට සාපේක්ෂ ආර්ද්‍රතාව වැඩි විය හැකියි. උෂ්ණත්වය ස්වල්පයක් අඩු වන විට ජලවාෂ්ප ඝනීභවනය වේ දැයි දැන ගනු සඳහා සාපේක්ෂ ආර්ද්‍රතාව මැනීම වැදගත්ය.
උණුසුම් දිනවල අපේ සුව පහසුව රඳා පවත්නේ ද සාපේක්ෂ ආර්ද්‍රතාව මතයි. එවැනි දිනක සාපේක්ෂ ආර්ද්‍රතාව අධික නම් අපට මහත් අපහසු ගතියක් දැනෙයි.
සාපේක්ෂ ආර්ද්‍රතාව මැනීම පිණිස නොයෙක් ආර්ද්‍රතාමාන වර්ග භාවිත කරනු ලැබේ. (ආර්ද්‍රතාමානය බ.)
(සංස්කරණය: 1965)
