ආහාර හා කෘෂිකර්ම සංවිධානය
"සෑම දේශයක ම සෑම කෙනෙකුන් මේ බියෙන් හා අගහිඟයෙන් මිදී දිවි පවත්වා ගෙනයනු දැකීම" සඳහා කටයුතු කිරීමට පොරොන්දුවක් අත්ලන්තික් ප්‍රඥප්තියේ (අත්ලන්තික් ප්‍රඥප්තිය (බ.)) අඩංගු විය. එමෙන් ම, "ජීවන තත්වය නඟා සිටුවීමට හා පූර්ණ සේවා නියුක්තිය ඇති කිරීමට" පොරොන්දුවක් එක්සත් ජාතීන්ගේ ප්‍රඥප්තියේ සඳහන් වෙයි. මෙහි සඳහන් වන අයුරු ඒ අරමුණු ඉටුකර ගැනීමට එක්සත් ජාතීන්ගේ සංවිධානය මගින් විශේෂිත ආයතන ගණනක් ම පිහිටුවා ඇත. ආහාර හා කෘෂිකර්ම සංවිධානය ඉන් එකකි. විශේෂිත ප්‍රශ්න විසඳීමෙහි ලා එක්සත් ජාතීන්ගේ සංවිධානය මගින් කැඳවනු ලැබූ මුල්ම සම්මේලනය වූයේ 1943 දී හොට් ස්ප්‍රිස් නම් ස්ථානයේ දී පවත්වන ලද ආහාර හා කෘෂිකර්ම පිළිබඳ සම්මේලනයයි. මේ සම්මේලනය මඟින් ආහාර හා කෘෂිකර්ම සංවිධානයට ව්‍යවස්ථාවක් සම්පාදනය කිරීම සඳහා කොමිසමක් පත් කරනු ලැබුවේය. ක්විබෙක්හි සම්මේලනයක දී මෙකී ව්‍යවස්ථාවට ජාතීන් 42කගේ අත්සන් තැබීමෙන් පසු ආහාර හා කෘෂිකර්ම සංවිධානය නියම වශයෙන් 1945 ඔක්තෝම්බර 16 වැනි දින ඇති විය.
ආහාර හා කෘෂිකර්ම සංවිධානයේ ප්‍රතිපත්ති හා වැඩපිළිවෙළ පුළුල් වශයෙන් නිශ්චය කෙරෙන්නේත් එහි අයවැය ලේඛනය නිශ්චය කෙරෙන්නේත් අවුරුදු දෙකකට වරක් පවත්වන මේ සම්මේලන රැස්වීමේ දීය. සමස්ත වශයෙන් සම්මේලනය රැස්වන වාර තුළ දී රටවල් 25ක නියෝජිතයන්ගෙන් සමන්විත වන මණ්ඩලයක් මේ සංවිධානයේ වැඩකටයුතු සලකා බලයි. ආහාර හා කෘෂිකර්ම සංවිධානයේ ප්‍රධාන කාර්යාලය පිහිටුවා තිබෙන්නේ රෝමයෙහිය.
මිනිසුන්ට අවශ්‍ය කෑම්බීම් ලබා දී ඔවුනට වඩා හොඳින් ජීවිතය ගත කිරීම සඳහා පහසුකම් සලසා දීමට, එනම් ජීවන තත්වය නඟා සිටුවීමට, ආහාර හා කෘෂිකර්ම සංවිධානය ප්‍රයත්න දරයි. ලෝකයේ රටවල ආහාර නිෂ්පාදනය වැඩි කිරීම, ආහාරවල පෝෂ්‍යදායකත්වය දියුණු කිරීම හා කෘෂිකාර්මික ද්‍රව්‍ය හොඳින් බෙදාහැරීම මේ සංවිධානයේ අවධානය යොමු වන ප්‍රධාන කටයුතු වේ.
ඇත්ත වශයෙන් ආහාර හා කෘෂිකර්ම සංවිධාන යේ කටයුතු සියල්ලක් ම යොදා ඇත්තේ ලෝක ආර්ථික ක්‍රමය පුළුල් කිරීමටය. මේ නිසා මෙම සංවිධානය කෘෂිකර්ම අංශයට පමණක් එහි කටයුතු සීමා නොකරයි. වන රෝපණය හා දැව කර්මාන්තය මෙන්ම ධීවර කර්මාන්තය දියුණු කිරීම ද මේ සංවිධානයේ සැලකිල්ලට භාජන වේ. මෙකී කර්මාන්ත පිළිබඳව ආහාර හා කෘෂිකර්ම සංවිධානයෙන් කෙරෙන වැඩ සලකා බලන විට එක් විශේෂ කරුණක් පෙනී යයි. එනම් මේ කටයුතු සියල්ලක්ම ප්‍රාවෛධික කටයුතු බවයි. ඉහතකී කර්මාන්තවලට අදාළ ස්වාභාවික සම්පත් දියුණු කිරීම. එම කර්මාන්තවලට වඩාත් දියුණු වූ නිෂ්පාදන හා පරිපාදන (processing) කාර්මික ක්‍රම යෙදීම, ශිල්පීන් පුහුණු කිරීම, රජයේ අවශ්‍ය සේවාවන් ඇති කිරීම සහ කෘෂිකාර්මික ව්‍යුහය උසස් කිරීම, ආහාර හා කෘෂිකර්ම සංවිධානයෙන් කෙරෙන කාර්යයෝය.
මේ සංවිධානය මගින් කෙරෙන කෘෂිකාර්මික වැඩකටයුතු අතර පස ආරක්ෂා කිරීම, පස හා ජලය ආදි ස්වාභාවික සම්පත් දියුණු කිරීම වැනි කටයුතු සම්බන්ධයෙන් ආණ්ඩුවලට උපකාරී වීම හා ආණ්ඩුවල සහයෝගය ඇතිව පස සහ ඉඩම් පිළිබඳ සමීක්ෂණ පැවැත්වීම ද වේ. ඉන්දියාව මේ අනුව අයිරානය සහ එල් සල්වදෝර් යන රටවල ඉඩම් සමීක්ෂණ පැවැත්වීමට 1960 දී තීරණය කරන ලදි. ගොවි යන්ත්‍ර හා උපකරණ පාවිච්චි කිරීම, පසෙහි සාරවත් බව වැඩි කිරීම, යන්ත්‍රෝපකරණ දියුණු කිරීම, ලෝකයේ පවත්නා අසාධාරණ ඉඩම් බුත්ති ක්‍රම සාධාරණ තත්වයකට ගෙනම ගොවි පවුල්වලට තමන් වගා කරන ඉඩම් සම්බන්ධයෙන් ආරක්ෂා සහිත තත්වයක් ගෙන දීම ද මේ සංවිධානයේ සැලකීමට භාජන වූ කරුණුය. මෙපමණක් නොව ආහාර හා කෘෂිකර්ම සංවිධානය ප්‍රධාන ධාන්‍ය වර්ග වගා කිරීම සම්බන්ධයෙන් අසල්වැසි රටවල් අතර සහයෝගය ඇති කරවයි. වී වගා කිරීම සඳහා ඈත පෙරදිග රටවල් අතරද බාර්ලි සහ තිරිඟු වගා කිරීම පිළිබඳව යුරෝපයට ආසන්න පෙරදිග රටවල් අතරද ඉරිඟු වගා කිරීම පිළිබඳව යුරෝපීය රටවල් අතර ද සහයෝගය ඇති කරගෙන යනු ලැබේ. ආහාර හා කෘෂිකර්ම සංවිධානය විසින් කරනු ලබන තවත් කටයුත්තක් නම් පර්යේෂණ සඳහා ඇට බෙදා හැරීමයි. ගොවි කර්මාන්තයට බෝග මාරුව පුරුදු කිරීමටත් සතුන් ඇති කිරීම සඳහා තණකොළ වැවීමට සහ පිදුරු වැනි සත්ව ආහාර නිපදවීමටත් ආණ්ඩුවට අනුබල දීම ද ඉන් කෙරේ. එසේම ශාකරෝග නැති කිරීම සහ සත්ව රෝග මර්දනය සඳහා ප්‍රාදේශික ව්‍යාපාර ඇරඹීම ද කරනු ලැබේ.
ගැමි ජීවිතය දියුණු කිරීම සඳහා ආහාර හා කෘෂි- කර්ම සංවිධානය මඟින් නොයෙකුත් පියවර ගනු ලැබෙයි. ගොවි ජනයාට ණයට මුදල් ලබා ගැනීමේ පහසුකම් සැලසීම, ගොවීන්ගේ සමුපකාර සමිති ඇති කිරීම, හස්ත කර්මාන්ත සහ වෙනත් ග්‍රාමීය කර්මාන්ත පිළිබඳ පර්යේෂණ පැවැත්වීම යන මේවා ඊට නිදසුනි.
වන ද්‍රව්‍ය ප්‍රයෝජනයට ගැනීම සහ වන ආරක්ෂාව ආහාර හා කෘෂිකර්ම සංවිධානය මගින් කෙරෙන ප්‍රධාන කාර්යයකි. මේ පිළිබඳ නොයෙකුත් සමීක්ෂණ එක්සත් ජාතීන්ගේ ප්‍රාදේශික ආර්ථික කොමිසම් හා එකතුව පවත්වනු ලැබේ. දැව අලෙවි කිරීමේ ක්‍රම, කඩදාසි හා පල්ප වැඩි කිරීමේ ක්‍රම යනාදි විෂයයන් සම්බන්ධ පර්යේෂණ ද පවත්වනු ලැබේ.
ලෝකයේ ධීවර කර්මාන්ත දියුණු කිරීම තවත් වැදගත් අරමුණකි. ධීවර කර්මාන්ත දියුණු කිරීමේ දී පැනනඟින ප්‍රාවෛධික ප්‍රශ්න සම්බන්ධයෙන් සංවිධානය ආණ්ඩුවට ආහාර හා කෘෂිකර්ම උපදෙස් සපයයි. මාළු ඇල්ලීමට යාන්ත්‍රික උපක්‍රම යෙදීම හා අලෙවිය සඳහා නවීන ක්‍රම ආරම්භ කිරීම පිළිබඳ උපදෙස් මේ සංවිධානය මගින් සපයනු ලැබේ. මධ්‍යධරණී ඉන්දු ශාන්තිකර සහ ලතින් ඇමෙරිකානු රටවල් වෙන් වෙන් වශයෙන් ගෙන ඒවායේ ධීවර කර්මාන්ත සම්බන්ධයෙන් පැන නඟින ප්‍රශ්න සලකා බැලීම සඳහා ධීවර මණ්ඩලය පත්කර ඇත. ඒ ඒ ප්‍රදේශවල ධීවර කර්මාන්තය දියුණු කිරීම සඳහා රටවල් අතර සහයෝගය ඇති කිරීම අරමුණු කොටගෙනය.
ඌන සංවර්ධිත රටවල ප්‍රාවෛධික දැනීම අඩුය. මේ සම්බන්ධව ඒ රටවලට ආධාර දීම, එනම් කාර්මික ශිල්පීන් සැපයීම, කාර්මික ශිල්පීන් පුහුණු කිරීම සඳහා පුහුණු කිරීමේ ආයතන පිහිටු වීම වැනි කාර්යයන් ආහාර හා කෘෂිකර්ම සංවිධානය මගින් සිදුවෙයි. විශේෂිත ආයතන සඳහා එක්සත් ජාතීන්ගේ විස්තීර්ණ ප්‍රාවෛධික ආධාර වැඩ පිළිවෙළ ප්‍රදානය කරන මුදලින් විශාලතම කොටස ලබන්නේ ආහාර හා කෘෂිකර්ම සංවිධානයයි.
ධීවර කර්මාන්ත ශිල්පීන් පුහුණු කිරීමට ආයතන යක් 1960 දී ඉන්දියාවේ පිහිටුවන ලදි. කාර්මික ශිල්පීන් පුහුණු කිරීමට ආයතන තවත් 2ක් ඉරාකයේ සහ ලෙබනන්හි පිහිටුවා ඇත.
කුසගිනි නිවාරණ ව්‍යාපාරය:
සාගින්න හා අගහිඟය නැති කිරීම සඳහා අවුරුදු 5ක ලෝක ව්‍යාප්ත ව්‍යාපාරයක් ගෙන යෑමට 1959 ආහාර හා කෘෂිකර්ම සංවිධාන සම්මේලනයේ දී තීරණය කරන ලදි. අද ලෝකයේ, විශේෂයෙන්ම ආසියා තික රටවල, මන්ද පෝෂණයෙන් පෙළෙන ජනතාව විශාලය. මේ ප්‍රශ්නය වඩාත් බලවත්ව පවතින්නේ ආසියාතික රටවල ආහාර සාමාන්‍යයෙන් අඩු බැවිනි. එපමණක් නොව මේ රටවල ජනගහනය ශිඝ්‍රව වැඩීම ද එක් හේතුවකි. එහෙත් කෙසේ හෝ ආහාර හිඟයට ප්‍රධාන හේතුව වන්නේ කෘෂිකර්ම නිෂ්පාදනය මඳ වීමයි. එහෙයින් ඌන සංවර්ධිත රටවල ආහාර නිෂ්පාදනය වැඩි කිරීමට කටයුතු මෙකී කිරීම මේ ව්‍යාපාරයේ මූලික අරමුණයි. මෙකී ව්‍යාපාරය මඟින් ඌන සංවර්ධිත රටවල ආහාර නිෂ්පාදනය වැඩි කිරීම පිළිබඳ වගකීම දියුණු වූ රටවලට පවරා ඇත. ආහාර නිෂ්පාදනය වැඩි කිරීමට යොදන තවත් උපක්‍රමයක් නම් නොයෙක් ජාතික ව්‍යාපාර මගින් කෘෂිකර්ම නිෂ්පාදනය දියුණු කිරීමයි.
ජාත්‍යන්තර ආපත්කාලීන ආහාර කොමිටිය මේ සංවිධානය යටතේ පවතියි. 1962 අප්‍රේල් 16 දින ආහාර හා කෘෂිකර්ම සංවිධානයේ පාලක සභාව මගින් ආප කාලවල දී වැඩිපුර ආහාර ද්‍රව්‍ය ඇති රටවලින් නැති රටවලට ආහාර සැපයීම සඳහා පවුම් 3,60,00,000ක මුදලක් වෙන් කරන ලදි.
හදිසියේ යම් රටක සාගතයක් ඇති වී ආහාර හිඟයක් වූ විට ඒ රටට ආහාර යැවීම ද ළදරුවන්ට හා පාසැල් යන ශිෂ්‍යයන්ට ආහාර සැපයීම සඳහා ආධාර කිරීම ද මේ වැඩ පිළිවෙළ මගින් සිදු වේ. රටවල් අතර පැනනඟින දේශපාලන ගැටළු සහ කලකෝලාහල මෙන් ම රටවල පවත්නා උග්‍ර වූ ආර්ථික ප්‍රශ්න ද විසඳීමට පිළිවෙළක් යොදා නොගතහොත් ලෝකසාමය රැකගැනීමට යොදන මොනම විධිවිධානයක් වත් සාර්ථක නොවන්නේය. ආහාර හිඟය නොහොත් ආර්ථීක දුර්වලත්වය හේතු කොටගෙන පැනනඟින දේශපාලන වියවුල් නැති කිරීමට නම් ඒ ඒ රටවල හා පෙදෙස්වල ආර්ථික දියුණුව ඇති කරනු වස් ආධාර දීම අවශ්‍යය. ආහාර හා කෘෂිකර්ම සංවිධානයට පදනම් වූ මූලික අදහස මෙය වේ.
(සංස්කරණය:1967)
