ඇංග්ලෝ-සැක්සන්
පස්වන සවන සියවස්හි දී ටියුටන් ගෝත්‍රික ඇංගල්, සැක්සන් සහ ජූට් වර්ගයා එක්වීමෙන් පහළ වූ ජාතිය ඇංග්ලෝ-සැක්සන් නමින් හැඳින්වේ. ඉහත කී ජාතින් අතුරෙන් මුලින් ම එංගලන්තයට පැමිණියේ ජූට්වරුන්ය. වර්තමාන ඩෙන්මාර්කයට අයත් ජට්ලන්ත අර්ධද්වීපයෙන් පැමිණි මොවුහු ස්කොට් හා පික්ට් සතුරන් පලවා හැර කෙන්ට් ආදි ප්‍රදේශ තමන් යටතට ගෙන පදිංචි වූහ. ක්‍රිස්තු වර්ෂ 5 වැනි සිය වසේ දී වයඹදිග ජර්මනියෙන් පැමිණි සැක්සන් වරු දකුණු එංගලන්තයෙන් වැඩි කොටසක් අයත් කරගත්හ. අනතුරුව වර්තමාන ජර්මනියේ උතුරු භාගයෙන් පැමිණි ඇංගල්වරු මධ්‍ය හා උතුරු එංගලන්තයත් දකුණු ස්කොට්ලන්තයත් අක්කොට ගෙන පදිංචි වූහ.
වෙසෙක්ස්හි රජකම් දැරූ මහා ඇල් ප්‍රඩ් ක්‍රි.ව. 878 දී ඩේන්වරුන්ගේ ආක්‍රමණය මැඩ පවත්වා ඇංගල්වරුන්ට අයත්ව තිබූ නැගෙනහිර ඇංග්ලියාව, නෝතම්බ්‍රියාව හා ම'ෂියාව යන පළාත් ද සැක්සන්වරුන් යටතේ වූ එසෙක්ස්, සසෙක්ස් හා වෙසෙක්ස් යන පළාත් ද ජූට්වරුන් සතුව තිබුණු කෙන්ට් හා දකුණු හැම්ප්ෂයර් පළාත් ද එක්සත් කෙළේය. එදා සිට නෝමන් ආධිපත්‍යය දක්වා කාල පරිච්ඡේදයේ එංගලන්තයෙහි ඉතිහාසය ද භාෂාව හා සාහිත්‍යය ද පොදු වශයෙන් හැඳින් වෙන්නේ ඇංග්ලෝ-සැක්සන් යන නාමයෙනි.
සාමාන්‍යයෙන් ඇංගල් හා සැක්සන් වර්ගයා අතර භාෂාව හෝ සිරිත් විරිත් හෝ අතින් සැලකිය යුතු වෙනසක් දක්නට නොලැබෙන හෙයින් මුල දී ඔවුන් දෙවර්ගයා වෙනස් ගෝත්‍රද්වයක් හැටියට පැවතියහයි සිතිය හැකි වුව ද එංගලන්තය ආක්‍රමණය කිරීමට පෙරාතුවම ඔවුන් සම්බන්ධව සිටින්නට ඇතැයි කියන ඉතිහාසඥයෝ ද වෙති. එසේ වුව ද එසෙක්ස්, සසෙක්ස්, වෙසෙක්ස් යන පළාත් නම් සැක්සන්වරුන්ගේ පදිංචිය නිසා ඇති වූ බව ද ඇංග්ලියා නම ඇංගල්වරුන්ගේ පදිංචිය නිසා ඇති වූ බව ද පෙන්වන අනික් පක්ෂය ඉහත දැක්වූ පරිදි, ඇංගල්, සැක්සන්, ජූට් යන තුන්වර්ගයා තුන් පළාතකින් පැමිණ කලක් එංගලන්තයෙහි ද වෙනස් ජාතික සංස්කෘතික ලක්ෂණ සහිතව ජීවත් වූ වෙනස් ජාතීන් හැටියට දක්වති. ඇංග්ලෝ-සැක් සන් යන වචනය ඇති වූයේ ඇල්ප්‍රඩ් රජු විසින් එම ප්‍රදේශ එක්සත් කරනු ලැබීමෙන් පසුවය.
(සංස්කරණය:1967)
