ඇකිලීස්
හෝමර්ගේ ඉලියඩ් නමැති කාව්‍යයේ සඳහන් වන ශ්‍රෙෂ්ඨ වීරචරිතයකි. පීලියුස් නමැති තෙසලියානු රජු නිසා තීටිස් නමැති මුහුදු දෙව්දවට ලැබුණු පුත්‍රයා වූ ඔහු මර්මිඩොන් හමුදාවේ අධිපතියා වශයෙන් ග්‍රීක හමුදාවන් සමඟ එක් වී ට්‍රෝජන් යුද්ධයට සහභාගි විය. එහෙත් මහසෙන්පති ඇගැමෙම්නෝන් සමඟ ඇති වූ අමනාපයක් නිසා ඔහු සටනින් ඉවත් විය. පසුව තම පරම මිත්‍ර පැට්‍රොක්ලස් නමැත්තා යුදබිමෙහි දී හෙක්ටර් විසින් ජීවිතක්ෂයට පමුණුවනු ලැබීම නිසා ශෝකයෙන් හා කෝපයෙන් භරිත වූ ඇකිලීස් ට්‍රෝජන්වරුන්ගෙන්, විශේෂයෙන් හෙක්ටර්ගෙන්, පළිගැනීමේ පරමාර්ථයෙන් රණ බිමට පිවිස හෙක්ටර් මරා ග්‍රීකයන්ට ජය අත්කොට දුන්නේය.
මාරක තුවාළවලින් නිරුපද්‍රැත කරවනු පිණිස ඇකිලීස්ගේ මාතෘ දෙව්දුව විසින් ඔහු ස්ටික්ස් නමැති ගඟේ ගිල්වා ගන්නා ලදැයි ද ඒ අවස්ථාවේ දී ඇය ඔහුගේ විළුඹින් අල්ලාගෙන සිටි හෙයින් දියෙන් නොතෙමුණු එම ස්ථානය ඔහුගේ මාරක ස්ථානය වශයෙන් ශේෂ වූයේ යයි ද කියති.
හෙක්ටර්ගේ මල් පැරිස් කුම්රුන් විසින් ඇකිලීස්ගේ මාරකස්ථානය වූ විළුඹට විද ඔහු මරුමුවට පමුණුවන ලදැයි පසු කාලයට අයත් කතාපුවත්වල සඳහන් වෙයි. මරණින් පසු ඇකිලීස් දිව්‍යත්වය ලැබී යයි කියනු ලැබේ.
(සංස්කරණය:1967)
