ඇල්බට්රොස්

ප්‍රෝසෙලාරිපෝමේස් (Procellariiformes) ගෝත්‍රයෙහි ඩයොමෙඩයිඩෙ (Diomedeidae) කුලයට අයත් පක්ෂි විශේෂ 13කට මේ නාමය භාවිත කරනු ලැබේ. උතුරු අත්ලන්තික් සාගරය හැර අන් හැම සාගරයක ම මේ පක්ෂීහු වෙසෙති. එහෙත් උන් බහුලව දක්නට ලැබෙන්නේ දක්ෂිණ අර්ධගෝලයෙහිය.

මුහුදු කුරුල්ලන් අතුරෙන් විශාලතම කුරුල්ලා ඇල්බට්රොස්ය. උගේ හොට දිගය, ශක්තිමත්ය; අග නැමී ඇත. හොට දෙපැත්තෙහි නළ වැනි නාස් පුට දෙකක් තිබේ. ඌට ජාලපාද තිබේ. ඒවා කොටය. මේ පක්ෂියාට පස්සා ඇඟිල්ලක් නොමැතියි. උගේ අත්තටු පටුය; ඉතා දිගය. විශාල ම ඇල්බට්රොස් වූකලි ඩයොමෙඩෙයා එක්සුලාන්ස් (Diomedea exulans) ය. උගේ පියාපත් දිග හැරිය විට එක් කොනක සිට අනෙක් කොනට අඩි 12ක් පමණ වෙයි. පියාසර කිරීමෙහි ඉතා දක්ෂ මේ කුරුල්ලෝ ගොඩබිමෙන් ඉතා ඈත මුහුදු මැද දී පවා දක්නට ලැබෙත්. උන් විඩා හැරීමට පවා මොහොතක්වත් නොනැවතී දින ගණන් නැව් පසු පස්සේ පියාඹා එනු දක්නට ලැබේ. පියාපත් නොසොල්වමින්, හුළං පාරවල පිහිටෙන්, උන්ට පැය ගණනක් අහසෙහි ගමන් කිරීමට පිළිවන. දැල්ලන් ආදි කුඩා මූදු සතුන් කා ජීවත් වන ඔවුහු නැව්‍වලින් ඉවතලන ආහාර ද්‍රව්‍යාදිය ද කති. උන් නිදන්නේ ජලය මතය. මස් ඇමුණු බිළී කොකුවල ආධාරයෙන් උන් අල්ලා ගැනීමට පිළිවන.

ඇල්බට්රොසයන් ගොඩබිමට එන්නේ බිත්තර ලෑමට පමණකි. ඔවුහු ඒ සඳහා ජනශූන්‍ය දූපතක් හෝ පාළු වෙරළක් හෝ තෝරා ගෙන සමූහ වශයෙන් එහි රැස්වෙති. මේ පක්ෂියා වරකට ලන්නේ එක බිත්තරයක් පමණි. කැදැල්ලක නොව බිම තබා රකිනු ලබන ඒ බිත්තරය ලොකුය; සුදුය.

(සංස්කරණය: 1967)