ඇලෙක්සැන්ඩර් නේව්ස්කි

(1220-1263). රුසියාවේ ජාතික වීරයෙක් ද සාන්තුවරයෙක් ද වේ. නොව්ගොරොද්හි දෙවෙනි ජරොස්ටව් මහාදිපාදයන්ගේ පුත්‍ර මෙතෙමේ සිය පියා ජීවත් ව සිටිය දී ම නොව්ගොරොද්හි මහාදිපාද පදවිය ලැබීය. මොහුගේ මුල් කාලය ගත වූයේ ස්වීඩ්වරුන්, ජර්මන්වරුන් හා ලිතුවේනියන්වරුන් සමඟ සටන් කිරීමෙනි. මොහුට ‘නේව්ස්කි’ යන විරුදාවලිය ලැබුණේ 1240 දී නීවා ගඟබඩ දී ස්වීඩ්වරුන් පරාජයට පත් කිරීමෙන් පසුවය. 1242 දී හේ ටියුටොනික් නයිට්වරුන් පරාජය කළේය. 1263 දී ගොරොදිව්හි දී මරුමුවට පත් හේ පසුව ජාතික වීරයකු හා සාන්තුවරයකු වශයෙන් සැලකෙන්නට විය.

(සංස්කරණය: 1967)