ඉන්ද්‍රගුරුළුව
මෙය පුරාණ කාලයෙහි ලක්වැසියන් අතර පැවති ගුප්ත ශාස්ත්‍ර ක්‍රමයකි. අෂ්ට දිශාවන්ගෙන් ප්‍රධාන දිශාව වූ නැගෙනහිරට ව්‍යවහාර වන 'ඉන්ද්‍ර' යන නාමය ද යෝනි අටෙන් ප්‍රධාන යෝනියට නම් වන 'ගුරුළු' යන නාමය ද එක් කොට මෙයට 'ඉන්ද්‍රගුරුළු' යන නාමය දී තිබේ. මීට සම්බන්ධ යෝනි අට නම් ගුරුළු, බළල්, සිංහ, දිවි, උරග, මූෂික, ඇත්, මුව යන මොව්හුය. මොවුනට රවි, කිවි, කුජ, රාහු, ශනි, සඳු, බුද, ගුරු යන ග්‍රහයෝ පිළිවෙළින් අධිපතීහු වෙති. ඉන්ද්‍රගුරුළුවේ ගණිත ක්‍රම දසයකි. මීට දසඅත කියා ව්‍යවහාර වේ. ඒ ඒ නාමාක්ෂරයන්ට නියමිත සංඛ්‍යා එකතු කොට බෙදීම් ආදියෙන් ඒ ඒ නම්වලට අයත් යෝනි දැනගත යුතු වේ. නවවන දසවන අත් (ගණිතක්‍රම) යොදනු ලබන්නේ නාමය නොදත් අවස්ථාවල දී යෝනි දැනගැනීමටය. දිනපතා දිවාරෑ දෙක්හි ගුරුළු චක්‍ර අටක් උදා වේ. එක් ගුරුළු මණ්ඩලයක් උදා වී පවත්නා කාලය ඉංග්‍රීසි පැය තුනකි. ඒ ඒ දිනාධිපතියාගෙන් පළමුවන ගුරුළු මණ්ඩලය උදා වී ඉන් පසු වාමාවෘත්තව ඔර්ලෝසු පැය තුනෙන් තුනට ඉතිරි මණ්ඩල ද උදා වී පසුදින සූර්යෝදයෙහි දී අෂ්ටයෝනි හිමි ගුරුළු මණ්ඩල අට අවසන් වේ. ගුරුළු උදාව පිළිබඳව තවත් සූක්ෂ්ම භේද කීපයක් වේ. ගුරුළු ආදි යෝනි අටෙහි භෝජන, ගමන, රජ, නිදි, මර වශයෙන් ක්‍රියා පසක් වෙයි. අයනාදි කාලයන් පහට බෙදීමෙන් ඒ ඒ කාලයන් ඇතුළත භෝජනාදි ක්‍රියා පසට සම්බන්ධ වන කාලප්‍රමාණ දත හැකි වෙයි. ඒ මෙසේය: උත්තරායනය ද දක්ෂිණායනය ද පූර්වපක්ෂය ද අපර පක්ෂය ද දවාල ද රාත්‍රිය ද පසළොස් පැය ද සත්පෑ සමාර ද යාමාර්ධය (තුන්පෑතුන්කාල) ද පිළිවෙළින් වෙන වෙන ම පහට බෙදූ කල අයනයකට මාස 1 දින 6 බැගින් ද පක්ෂයකට තිථි තුන බැගින් ද දවාලට හා රාත්‍රියට පැය හය බැගින් ද පසළොස් පැයට පැය තුනක් ද සත්පෑසමාරට පැය එකහමාරක් ද යාමාර්ධයට විනාඩි 45ක් ද වේ. උත්තරායනයේ දී වාමාවෘත්තව ද දක්ෂිණායනයේ දී දක්ෂිණාවෘත්තව ද භෝජනාදි ක්‍රියා සිද්ධිය වේ. මෙහි මුලින් සඳහන් කළ පක්ෂදිවානිශාදි කාල සම්බන්ධයෙන් ද භෝජනාදි ක්‍රියා මෙපරිද්දෙන් ම ගත යුතුයි. යථෝක්ත බෙදීම් අනුව ගුරුළු ආදි සිව්දෙන භෝජන කරන විට නාගාදි සතර දෙනාට මර වෙති. ඊළඟට ගුරුළු ආදි සතර දෙන ගමනෙහි යෙදෙන විට නාගාදි සිව් දෙන නිදති. නැවත ගුරුළු ආදි සතර දෙන රජ කරන විට නාගාදි සිව් දෙන ද රජ කරති. ඊළඟට ගුරුළු ආදි සිව් දෙන නිදන විට ඉතිරි සතර දෙන ගමනේ යෙදෙති. නැවත ගුරුළු ආදි සිව් දෙනාට මර වූ විට නාගාදි සිව් දෙන භෝජන කරති. මේ අනුව සූක්ෂ්ම බෙදීම් ද අවබෝධ කරගත යුතුයි. ඒ ඒ ගුරුළු මණ්ඩල උදාව පවත්නා කල ඒ ඒ යෝනීන්ගේ රජ භෝජන අවස්ථා ද යෙදී තිබුණොත් එම යෝනි හිමි නම් ඇත්තනට ජය අත් වේ.
ගුරුළු ආදි යෝනි අට භෝජනාදි ක්‍රියාවල යෙදෙන අවස්ථා යොදාගෙන කළ යුතු යුද්ධ, උගුල් ඇටවීම්, හබක් බැඳීම්, සතුරන් නැසීම්, අංගම්පොර, මල්ලපොර, දූකෙළි, නඩුහබ, ජය ලබන ක්‍රියා, රෞද්‍ර ක්‍රියා, ඉංකණු සිටුවීම්, බෝල බැඳීම් ආදියට පිටත් විය යුතු කාල, ජප කළ යුතු මන්ත්‍ර, පෙරමඟට හමු වන නිමිති (බාධා) ආදිය ඉන්ද්‍රගුරුළුවෙහි මැනවින් විස්තර වේ. ඒ ඒ යෝනිවල භෝජන, රජ, ගමන යන අවස්ථා සියලු කටයුතු සඳහා යෙදිය හැකි ශුභ වේලාවල් වේ. සපැයෙන් සපැයට යෙදෙන පෙරළුම ගල් කෙටීම, බෝලබැඳීම, යුද්ධ, අංගම්පොර, මල්ලපොර, කුකුළු මීගොන් පොර, දූකෙළි ආදියට ශුභයි. පෙරළුම්වේලා හැම විට ම රෞද්‍ර ක්‍රියා සඳහා යොදනු ලැබේ. මේ වේලාවන් අසු කර කඩ කැත්තෙන් ගලට කෙටූ කල කැපෙතැයි කියත්. හරි වේලාව අසු නොවුව හොත් කැඩෙත්ල. දෙදෙනකු හෝ වැඩි දෙනකු දෙපක්ෂයක් වී කරන සටන්, වාද වැනි කාර්යයක ප්‍රතිඵල දැනගැනීම සඳහා ද ඉන්ද්‍රගුරුළුව යෙදිය හැකිය. ඉෂ්ටානිෂ්ටපද්‍ය බන්ධනය සඳහා ඉන්ද්‍රගුරුළුව වහල්කරගත් බව කාව්‍යලක්ෂණමණිමාලාවෙන් ද පොරොන්දම් බැලීම සඳහා යෙදූ බව හෝරාභරණයෙන් ද ගමන් යාත්‍රාදිය සඳහා යෙදූ බව දෛවඥකාමධේනුවෙන් ද පැහැදිලි වේ.
මේ ශාස්ත්‍රය මගින් සොරුන් දැනගැනීම, ජය පරාජය හා ප්‍රශ්න විසඳීම, මුහූර්ත යෙදීම, නිමිති කීම, සතුරන් නැසීම, නඩුහබවලින් ජය ගැනීම ආදිය හා මීට ම සම්බන්ධ වූ යමකාලය, යමපිම්ම, රාහුපිම්ම, යමදණ්ඩ, දඬුමරණ, දඬුගැස්ම ආදි වූ විවිධ ශාස්ත්‍රානුසාරයෙන් බෝලබැඳීම, ගල් පර්වත පිපිරවීම, අල්ලස් ගන්නන් වැනසීම වැනි ආශ්චර්යවත් දේ කළ හැකි යයි කියත්. මන්ත්‍ර බොහෝ ගණනක් ද ඉන්ද්‍රගුරුළුවෙහි අන්තර්ගත වේ. එයින් පනස්හයක් මුඛ්‍යස්ථානයෙහි ලා සලකනු ලැබේ.
(සංස්කරණය: 1970)
