ඉන්ස්බ්රුක්
ඕස්ට්‍රියාවේ ටිරොල් පළාතෙහි අගනුවරයි. උත්තර අක්ෂාංශ 47°16′ හා නැගෙනහිර දේශාංශ 11°23′ ආශ්‍රිතව සිල් ගඟ ඉන් ගඟට එක් වන තැන දෙගංමැද පෙදෙසෙහි පිහිටා ඇත. දකුණින් සිල් ගඟ ඔස්සේ බ්‍රෙනර් කපොල්ල හරහා ස්විට්සර්ලන්තයටත් උතුරින් ස්කානිට්ස් කපොල්ල ඔස්සේ බැවේරියානු ප්‍රදේශයටත් මාර්ග පහසුකම් සහිත වූ ඉන්ස්බ්රුක් නගරය රෝම යුගයේ පටන් ම මාර්ග සන්ධිස්ථානයක් වශයෙන් දියුණු විය. පැරණි ඉතිහාසයක් සහිත ඉන්ස්බ්රුක්හි ඓතිහාසික වටිනාකමින් යුත් ගොඩනැඟිලි කීපයක් ද ඇත. IV වැනි ෆ්‍රෙඩරික් විසින් ඉදි කරනු ලැබූ මාළිගයත්, 16 වැනි ශතවර්ෂයේ දී පමණ ගොඩනඟන ලද ප්‍රැන්සිස්කානු දෙව් මැදුරත් I වැනි මැක්සිමිලියන් තැනූ රාජකීය මන්දිරයත් ඉන්ස්බ්රුක්හි වැදගත් ඓතිහාසික ගොඩනැඟිලි වේ. 1677 දී පිහිටුවන ලද විශ්වවිද්‍යාලය නිසා මේ නගරය ශාස්ත්‍රීය මධ්‍යස්ථානයක් ද වේ. ඇල්ප්ස් කඳු අතර ගංගා නිම්නයක පිහිටි ඉතා චමත්කාර ජනක යුරෝපීය නගරයක් ලෙස ගැනෙන ඉන්ස්බ්රුක් සංචාරකයන්ගේ සිත් ඇදගන්නා ස්ථානයකි. ඕස්ට්‍රියාවේ ගුවන් තොටුපළවල් සයෙන් එකක් මෙහි පිහිටා ඇත. ඉන්ස්බ්රුක්හි ප්‍රසිද්ධ උද්භිද උද්‍යානයක් ද ඇත. ලොම් හා වීදුරු කර්මාන්ත මෙහි තරමක් දියුණුය. ඉන්ස්බ්රුක්හි ජනගහනය (1961) 1,00,695කි.
(සංස්කරණය: 1970)
[[ප්‍රවර්ගය:]]
[[ප්‍රවර්ගය:]]
