ඉෂිකාරි
ජපානයේ හොකෙයිදෝ දිවයිනෙහි බටහිර පෙදෙසෙහි පිහිටි ගංගාවකි. දායිසෙත් සුසාන් කඳු බිම්වලින් පටන් ගෙන හොකෙයිදෝ දිවයිනෙහි බටහිර වෙරළේ ඔතාරු බොක්කට වැටෙන මෙය සැතැපුම් 228ක් දිගය. ජපානයේ මීට වඩා දිග එක ම ගංගාව ෂිනානෝය. උර්යු, සොරාචි හා ෂිකෝත්සු විලෙහි පිට මං ගඟද ඉෂිකාරි ගඟේ ප්රධාන අතු ගංගාය. උර්යු ගඟෙහි කෘත්රිම ජලාශයක් ආශ්රිතව පිහිටුවා ඇති උර්යු ජල විදුලි බල ස්ථානය හොකෙයිදෝහි විශාලතම ජල විදුලි මධ්යස්ථානයයි.
ඉෂිකාරි ගඟ අවට ඉෂිකාරි තැන්න වර්ග සැතැපුම් 36,917ක් පමණ විශාලය. විශාලත්වය අනුව ජපානයේ තැනිතලා අතුරින් දෙවැන්න මෙයයි. ඉෂිකාරි තැන්න හොකෙයිදෝහි ප්රධාන කෘෂිකාර්මික ප්රදේශයයි. ගල් අඟුරු බහුල මෙහි ආකර කර්මාන්තය දියුණුය. ඛනිජ තෙල් ආකර බිමක් ද මෙහි ඇත. සෝ-උන්-කියෝ නමැති ඉතා පටු දොරුව මැදින් ඉෂිකාරි ගඟ ඇද හැලෙන පෙදෙස දර්ශනීයය. විනෝදකාමීන් හා සංචාරකයන් ඇදගන්නා මේ ස්ථානයෙහි ඔවුන් සඳහා විශේෂ පහසුකම් ද ඇත. සැමන් හා ට්රෞට් මසුන් ඇල්ලීම ද මෙහි දියුණු කර්මාන්තයකි. ඉෂිකාරි තැන්නෙහි ප්රධාන නගරය සාප්පොරොය.
(සංස්කරණය: 1970)
