උතුරුපව් විහාරය

ලක්දිව බුද්ධාගම පැතිර ගිය මුල් අවදියෙහි කරවූ විහාරයන් අතුරෙන් එකෙකි. කුරුණෑගල දිස්ත්‍රික්කයේ හිරියාල හත්පත්තුවට අයත් ගොකරැල්ල නම් ග්‍රාමයෙහි පිහිටි මෙම විහාරයෙහි ගල්ලෙනක බෝධිගුප්ත කුමාරයන් විසින් කරවන ලදැයි සැලකෙන ප්‍රතිමා මන්දිරයක් තිබේ. දුටුගැමුණු රජතුමා විසින් ද කළුගලින් නෙළන ලද ප්‍රතිමා සහිත විහාරයක් මෙහි කරවන ලදැයි කියති. අභිනව විහාර මන්දිරයක් ගොඩනඟා තිබෙන මේ ස්ථානයෙහි පැරණි ගොඩනැඟිලිවල ගල්කණු ආදි නෂ්ටාවශේෂ ද තැන්තැන්වල දක්නට ඇත.

(සංස්කරණය: 1970)