උපතිස්ස

දීපවංසය, මහාවංසය වැනි ලංකා වංස කථා අනුව විජය කුමරු සමග ලක්දිවට පැමිණි අය අතුරෙන් එක් තැනැත්තෙකි. විජයගේ අනෙක් අනුගාමිකයන් කළා සේ ම ඔහු ද ජනපදයක් පිහිටුවූයේය. ඒ ගම්භීර නදී තීරයෙහි වූ උපතිස්ස ගාම (බ.) නම් ජනපදයයි.

විජයගේ මරණයේ සිට පණ්ඩුවාසදේවගේ ආගමනය තෙක් වූ අන්තර රාජ්‍ය සමයේ දී ඇමතිවරුන් උපතිස්ස නුවර සිට රට පාලනය කළ බව වංසකථාවල සඳහන් වන හෙයින් විජය රජුගේ පුරෝහිත වූ උපතිස්ස ඇමති පාලන කාර්යයෙහි ලා ප්‍රමුඛව ක්‍රියා කළහයි සිතිය හැකිය.

(සංස්කරණය: 1970)