උබ්බේරිය

(කරල්ලියා කලිකිනා - Carallia calycina_Benth). ලොකු ගසක් වන මෙය වැවෙන්නේ ලංකාවේ තෙත් වනාන්තරවල පමණකි. මෙහි අළුපාට තුනී පොත්ත තරමක් රළුය. විහිදී යන අතු රාශියක් සහිත මේ ගසෙහි කොළ සම්මුඛය. අන්තර්වෘන්තීය (interpetiolar) උපපත්‍ර (stipules) ලොකුය. මේවායේ යට පැත්තේ ග්‍රන්ථි තිබේ. අග්‍රස්ථ බහුඅක්ෂවල (cymes) සුදුමල් ස්වල්පයක් පිපේ. මලේ දල 4කි; රේනු 8කි. ඩිම්බකෝෂය අධරය. දිගින් අඟල් 1/2ක් පමණ වූ ඵලය හැඩයෙන් පේර ගෙඩියකට සමානය; රතුපාටය; මාංසලය.

උබ්බේරිය ලීය රතුපාටය; තරමක් බරය; පැළෙනසුලුය. මජ්ජා කිරණ (medullary rays) බොහෝ පළල් බැවින් ලීයෙහි සුළියක් බඳු අමුතු ම වයිරමක් ඇත. අලංකාර සීලිම්, පනේල ආදිය සෑදීමට උබ්බේරිය ලීය ගනු ලැබේ. ලංකාවට ප්‍රාදේශීය වූ මේ ශාකය රියොෆොරාසේ කුලයට අයත්ය.

(සංස්කරණය: 1970)