එකිකෙන් කයිබරා

(1650-1714). ජපන් පඬිවරයකු වූ මෙතෙමේ කොන්ෆියුසියානු ධර්මධරයෙක් ද විය. ෆුකුඕකා ප්‍රදේශයේ කයිබරා කොෂිසදා නම් වෛද්‍යවරයකුගේ පුත්‍රයකු වූ හේ ටික කලක් පියාගේ අඩිපාරේ යමින් වෛද්‍ය ශාස්ත්‍රය ප්‍රගුණ කොට පසුව එය අත්හැර දමා තේෂූ ධර්මය (චීන චුත්සු සහ තෙත්සු දර්ශනය) ඉගෙනීමට පටන් ගත්තේය. ඉතා ඉක්මනින් ම ප්‍රසිද්ධියට පත් කයිබරා ශ්‍රේෂ්ඨ කොන්ෆියුසියානු ධර්මධරයකු වශයෙන් සැලකිල්ලට පාත්‍ර වූයේය.

කයිබරා ප්‍රකට ජීව විද්‍යාඥයෙක් ද විය. ඔහු ජපානයේ ශාක විද්‍යාවේ ආදිකර්තෘ වශයෙන් සැලකිය හැකිය. හේ සෞඛ්‍යය හා ජපානයේ පැළෑටි පිළිබඳ ග්‍රන්ථ කීපයක් සම්පාදනය කෙළේය.

(සංස්කරණය: 1974)