එර්ෆුර්ට්
ජර්මන් ප්රජාන්ත්රවාදී සමූහාණ්ඩුවෙහි පාලන දිස්ත්රික්කයක් ද එම දිස්ත්රික්කයේ අගනුවර ද මෙනමින් ගැනේ. ගේරා නිම්නයේ පිහිටි එර්ෆුර්ට් දිස්ත්රික්කය ව. කිලෝමීටර් 7348ක් පමණ විශාලය. මෙහි ජනගහනය (1964) 1,246,807කි. මල්, එළවළු හා පලතුරු වැවීම සම්බන්ධයෙන් මෙම පළාත මහත් ප්රසිද්ධියක් උසුලයි.
ගේරා ගඟබඩ පිහිටි එර්ෆුර්ට් ජර්මනියේ ඉතා පැරණි නගරවලින් එකකි. යන්ත්ර සූත්ර, රසායන ද්රව්ය, විද්යුත් උපකරණ, ලෝම රෙදිපිළී, සංගීත භාණ්ඩ ආදිය නිපදවන කාර්මික මධ්යස්ථානයක් වශයෙන් ද මේ නගරය ප්රසිද්ධය. ක්රි.ව. 741 දී සාන්ත බොනිෆස් තම රාජගුරු පේරුව මෙහි පිහිටුවිය. 1255 පමණේ සිට මෙය නාගරික බලතල සහිත නගරයක් බවට පත් වී තිබේ. 15 වැනි සියවසෙහි දී හැන්සියාතික සංගමයේ සාමාජිකත්වය ලැබූ එර්ෆුර්ට් පාලන බලයෙන් මෙන් ම ආර්ථික වශයෙන් ද බොහෝ දියුණු විය. 1392 දී මෙහි පිහිටුවන ලද විශ්වවිද්යාලයෙහි මාටින් ලූතර් ද අධ්යාපනය ලැබීය. අධ්යයනාංශ හතරකින් යුක්ත කොට යුරෝපයේ පිහිටුවන ලද ප්රථම විශ්වවිද්යාලය මෙය විය. 1802 දී ප්රසියාවට අයත් වූ එර්ෆුර්ට් සැක්සනියේ කොටසක් බවට පත් විය. 1808 දී නැපෝලියන් හා රුසියාවේ I වැනි ඇලෙක්සැන්ඩර් අධිරාජයා බැවේරියා, වෙස්ට්ෆේලියා, සැක්සනි හා වර්ටම්බර්ග් යන රාජ්යයන්හි රජවරුන් සමග එර්ෆුර්ට් සම්මේලනය පවත්වන ලද්දේ මෙහි දීය. එර්ෆුර්ට්හි ඓතිහාසික ගොඩනැඟිලි අතර 12 වැනි සියවසේ දී ඉදිකරන ලද දේවස්ථානයක් හා 14 වැනි සියවසට අයත් සාන්ත සෙවරුස් (St. Severus) පල්ලිය ද වැදගත් වේ.
එර්ෆුර්ට් නගරයෙහි ජනගහනය (1964) 189,770කි.
(සංස්කරණය: 1974)
