එල්බුර්ස්

‍(Elburz). ඉරානයේ කඳුවැටි සමූහයකි. මේ කඳුවැටි අරාස් මිටියාවතේ සිට ඊශානදිග ඉරානය තෙක් සැතපුම් 140ක් පමණ විහිදීගොස් උතුරු ඛුරාසාන්හි දී අලා දාස් කඳුවලට සම්බන්ධ වේ. එල්බුර්ස් කඳු ආර්මීනියන් කඳු සමූහයත් හින්දු කුෂ් කඳු සහ පාමීර් කඳු සමූහයත් එකට සම්බන්ධ කරයි. වියළි ඉරාන් සානුවේ උතුරු මායිම වශයෙන් ද සැලකෙන මෙම කඳු වැටි එම සානුව ආර්ද්‍රත්වයෙන් යුත් කැස්පියන් මුහුදුබඩ තැන්නෙන් වෙන් කරයි. මේ කඳු කැස්පියන් මුහුද තෙක් ම විහිදී ගොස් ඇත. එනම්, මුහුදු වෙරළට සැ. 2 සිට 15 දක්වා නුදුරු වෙයි. මෙහි ඇතැම් කඳු මුදුන් අඩි 13,000කටත් වඩා උසය. උස ම කඳු මුදුන වූකලි ඩෙමවෙන්ඩ් (18,375) කූටයයි. මෙහි සමුද්‍රාසන්න කඳු ආර්ද්‍රය. තද වර්ෂාපතනයක් ඇත. කුඩා ගංගාදිය සහ වෘක්ෂලතාදිය බහුලය. ශීත සෘතුවේ දී කඳු මුදුන් හිමෙන් වැසී පවතී. සානු ප්‍රදේශ වියළි මුඩුබිම්ය. කැස්පියන් මුහුදට ගලා බස්නා කිශිල් උශුන් ගංගාව එල්බුර්ස් කඳු හරහා ගලන එක ම ගංගාවයි. මේ කඳු ඛනිජ ද්‍රව්‍යයන්ගෙන් පිරී ඇත ද ආකර කර්මාන්තය දියුණු වී නැත.

(සංස්කරණය: 1974)